Kandidati republikan presidencial, Donald Trump, i cili bëri bujë me propozimin për të ndaluar hyrjen e muslimanëve në Shtetet e Bashkuara, është vendosur nga gazetarët përpara mundësisë që kryebashkiaku i ri i Londrës të vizitojë Amerikën. Çfarë do të ndodhë me të. Sipas Trump, ai do të bënte një përjashtim për të sapozgjedhurin kryebashkiakun musliman të Londrës, raporton “New York Times”.
“Gjithmonë ka përjashtime”, citoi gazeta manjatin e pronave të paluajtshme dhe kandidatin pothuajse zyrtar të republikanëve për garën e Shtëpisë së Bardhë. Përgjigja e tij vjen pas pyetjes sesi do të aplikohej propozimi i tij për ndalimin e muslimanëve, një propozim që ngjalli mjaft kundërshti në atë kohë, por që kthehet në vëmendje gjithnjë ndërsa fushata përparon. Sadiq Khan është djali i një shoferi pakistanez autobuzi që u betua si kryebashkiak i Londrës, pas një fitoreje të thellë.
Trump deklaroi se ishte i kënaqur me zgjedhjen e Khan. “Isha i lumtur të shoh se… Mendoj se është një gjë vërtet e mirë, dhe shpresoj që ai të bëjë një punë vërtet shumë të mirë pasi, sinqerisht, kjo do të jetë shumë shumë e mirë”, tha Trump.
“Duhet ecur shembull pas shembulli, gjithnjë të drejtohesh nga shembulli. Nëse ai bën një punë të mirë, kjo do të ishte një gjë tmerrësisht e mirë”.
Trump doli me idenë e ndalimit të muslimanëve nga hyrja në SHBA pas sulmit vdekjeprurës të militantëve islamikë në Paris dhe në Kaliforni, vitin e kaluar. Muslimanët dhe grupet e të drejtave të njeriut, rivalët demokratë të Trump dhe shumë nga kundërshtarët republikanë në garë, e dënuan propozimin si ndarës, kundërproduktiv dhe në kundërshtim me vlerat amerikane.
Khan, kandidat i partisë Laburiste, mposhti rivalin konservator, Zac Goldsmith me një përqindje rekord, e siguroi mandatin më të madh individual në historinë e politikës britanike pas një fushate toksike.
Duke folur për taktikat e konservatorëve, Khan tha për “Observer”: “Ata përdorën frikën dhe kërcënimet në përpjekje për të kthyer votën e grupeve të ndryshme etnike dhe fetare kundër njëri-tjetrit- diçka që tingëllon si e marrë drejtpërdrejt nga rregullorja e Donald Trump”.
Gjatë një interviste me revistën “Time”, Khan tha se dëshironte të shkonte në Shtetet e Bashkuara për të parë programet interesante që kryebashkiakët e Nju Jorkut dhe Çikagos po zbatojnë, por se ai duhet ta bënte vizitën përpara janarit, në rast se Trump fiton në zgjedhjet e 8 Nëntorit.
“Nëse Donald Trump bëhet president, do më ndalojnë të shkoj atje për shkak të besimit tim, që do të thotë se nuk mund të punoj me kryebashkiakët e Amerikës dhe të shkëmbej idetë e mia me ta”, tha Khan.
Përgatiti: Juli Prifti – /tesheshi.com/
