Arabia Saudite ka tërhequr ambasadorin e saj në Berlin pas disa komenteve “me spec” të ministrit të jashtëm Sigmar Gabriel, dhe ka njoftuar se do t’i dërgojë notë diplomatike ambasadorit gjerman në Riad.
“Arabia Saudite ka vendosur të tërheqë ambasadorin e saj në Gjermani për konsultime dhe do t’i dorëzojë ambasadorit gjerman një letër proteste për këto deklarata të paqëlluara dhe të pabazuara”, njofton SPA, duke cituar një zëdhënës të ministrisë së jashtme saudite.
“Këto vërejtje, të cilat konsiderohen të pa qëlluara dhe të bazuara në informacione të rreme, nuk do të ndihmojnë në krijimin e stabilitetit në rajon”, tha zëdhënësi.
Deklarata thotë se komentet e Gabrielit “nuk përfaqësojnë pozicionin miqësor të qeverisë gjermane, e konsideruar nga Mbretëria si një partnere e besueshme në luftën kundër terrorizmit dhe ekstremizmit”.
Ministri i Jashtëm i Gjermanisë, Sigmar Gabriel, gjatë një takimi me ministrin libanez të Punëve të Jashtme dhe Emigrantëve, Gebran Bassil, të zhvilluar në Berlin më 16 nëntor, kritikoi ashpër qëndrimin e Arabisë Saudite për dorëheqjen e Haririt. Gabriel ishte shprehur se ndan shqetësimin rreth kërcënimit të jostabilitetit dhe gjakderdhjes në Liban dhe, pa përmendur drejtpërdrejt Arabinë Saudite, tërhoqi vërejtjen kundër “aventurizmit” prapa krizës në Liban.
Pasi tërhoqi vëmendjen se mund të ketë konflikte në Liban të cilat mund të përhapen në vendet fqinje, Gabriel deklaroi se Hariri duhet të lejohet të kthehet në vendin e tij me qëllim të zgjidhjes së problemeve atje.
Hariri nga kryeqyteti i Arabisë Saudite, Riad, më 4 nëntor njoftoi dorëheqjen nga detyra e tij si kryeministër i Libanit. /tesheshi.com/
