Albin Kurti, një ish-i burgosur politik, protestues rruge dhe politikan që hodhi gaz lotësjellës në parlamentin e tij, është kandidati më i mundshëm për kryeministrin e Kosovës pas triumfit të partisë së tij reformuese në zgjedhje – komentojnë kështu disa media europiane lidhur me zgjedhjet në Kosovë dhe fitoren e Vetëvendosjes.
Kurti u quajt “Che Guevara e Kosovës” dhe “Gandi me gaz lotsjellës” për shkak të metodave radikale, ndërsa partia e tij Vetëvendosje fitoi zgjedhjet me 48 përqind të votave, shkruan agjencia France Presse.
Gjatë fushatës dhe pas njoftimit të rezultateve, Kurti përsëriti se detyra e tij kryesore është të zhdukë korrupsionin që ka pllakosur Kosovën për më shumë se dy dekada.
Kosova është një nga pjesët më të varfra të Evropës dhe Kurti njoftoi një fillim të ri për vendin më të ri evropian në Prishtinën me dëborë, por shtoi se nuk do të jetë e lehtë, sipas agjencisë.
“Ne kemi shumë punë për të bërë sepse shteti po përballet me disa kriza. Rruga do të jetë e gjatë,” tha kosovari karizmatik, i vlerësuar për aftësitë e tij komunikuese.
“Këto zgjedhje ishin një referendum mbi gjyqësorin dhe vendet e punës, kundër korrupsionit dhe vjedhjes së burimeve shtetërore.”
Lëvizjes së Kurtit iu bashkua Presidentja e përkohshme Vjosa Osmani, 38 vjeçe, përfaqësuese e një brezi të ri politik që u largua kohët e fundit nga Lidhja Demokratike e Kosovës (LDK).
Kundër elitës
Kurti dhe Osmani janë bërë simbol i dëshirës për ndryshim në Kosovë pas një dekade sundimi nga heronjtë e luftës, por që sot akuzohen për korrupsion dhe nepotizëm.
Me një kauzë nacionaliste dhe një axhendë të majtë, Vetëvendosja ka kohë që po lëkund skenën politike të Kosovës.
Lëvizja u konceptua si rezistencë e të rinjve ndaj elitave në pushtet dhe ndikimeve të huaja në Kosovën e pasluftës.
Kurti, tani 45 vjeç, u bë i famshëm në vitet 1990 kur organizoi protesta studentore kundër shtypjes së regjimit serb ndaj shumicës shqiptare në Kosovë. Prandaj, ai kaloi dy vjet në burg si i burgosur politik.
Pas luftës, ai u bë zëri i kundërshtimit të udhëheqjes së Kosovës dhe bashkësisë ndërkombëtare, duke përdorur retorikën anti-perëndimore.
Dialogu nuk është një përparësi
Sot, Kurti duhet të bindë Perëndimin se ai nuk është më vetëm udhëheqësi i protestave studentore, dikur të dhunshme, që kosovarët i mbajnë mend akoma.
Gjatë protestave më të ashpra, mbështetësit e Kurtit përmbysën automjetet e EULEX-it, misionit të Bashkimit Evropian në Kosovë, e ku nga ana tjetër, forcat e Kombeve të Bashkuara vranë dy anëtarë të Vetëvendosjes me plumba gome.
Në 2018, anëtarët e partisë hodhën disa herë gaz lotsjellës në ndërtesën e parlamentit për të protestuar kundër miratimit të ligjeve të diskutueshme. Kurti u ndalua të ishte deputet për shkak të këtyre incidenteve, por kjo nuk e ndalon atë të formojë një qeveri të re.
Për këtë, atij do t’i duhet vetëm mbështetja e partive të pakicave, të cilat kanë 20 nga 120 deputetë.
Si kryeministër, ai përballet me detyrën e vështirë për të kryer një dialog me Serbinë, e cila refuzon të njohë Kosovën, gjë e cila parandalon të dy vendet të bashkohen me Bashkimin Evropian, kujton FP.
Kurti thotë se bisedimet me Beogradin nuk janë përparësia e tij.
“Dialogu me Serbinë është në vendin e gjashtë ose të shtatë për qytetarët e Kosovës. Prioriteti ynë është gjyqësori dhe vendet e punës”, shton ai. /tesheshi.com/
