Nga Blendi Gashi
Sondazhi i fundit i realizuar nga Instituti Demoraktik i Kosovës (KDI) tregon se nëse Kosova shkon në zgjedhje të jashtëzakonshme, LDK-ja e Isa Mustafës do i fitonte ato me 30.8% të përkrahjes qytetare, ndërsa mirë ka nxjerrë edhe Vetëvendosjen përkundër përçarjes (21.2%) e cila e ndjek nga pas PDK-në që renditet e dyta me 23 %. Por për këtë të fundit ky rezultat është tejet zhgënjyes pasi konfirmon se në krye me Veselin assesi s’po arrin të dalë e para.
Për AAK-në e Ramushit me 10.04 %, e NISMA-n e Limajt me mbi 6.03% është rezultat pozitiv, por jo Partinë Socialdemokrate të Shpend Ahmetit me vetëm 2.4%, që i bie se nuk e kalon pragun zgjedhor dhe mbetet jashtë Kuvendit.
Por si e lexojnë partitë këtë sondazh?
Shefi i grupit parlamentar të LDK-së, Avdullah Hoti nuk ka folur me shifra por ka vlerësuar se nën presion e këtyre rezultateve, partitë në pushtet, e veçanërisht PDK-ja, kanë filluar “gjuetinë e shtrigave”.
“Por, duhet ta kenë të qartë se këto rezultate janë vendim i qytetarëve, i të papunëve, rinisë, bujqve, pensionistëve, të cilët janë mashtruar nga kjo qeveri. Të gjithë këta po e thonë qartë se ka ardhur koha të shkoni në opozitë, aty ku e keni vendin moti”, ka shkruar Hoti në Facebook, duke thënë se nuk do të ketë asnjë kompromis për t’i dërguar në opozitë.
Shqipe Pantina, deputete e Partisë Socialdemokrate nuk i sheh shqetësuese shifrat e publikuara nga KDI-ja, duke thënë se partia e tyre është në konsolidim e sipër.
“PSD-ja është në fazën e riformulimit të saj. Edhe pse PSD-ja si parti ekziston gati që 20 vjet, ne si grup sapo e kemi marrë menaxhimin e partisë dhe njerëzit ende nuk e dinë se cila është PSD-ja e re. Si parti nuk kemi bërë ende sondazh sepse jemi duke u marrë akoma me ristrukturimin e subjektit. Por nuk është shqetësuese sondazhi në fjalë pasi nuk pritet të ketë zgjedhje të reja. Një sondazh tjetër që është dhënë së fundmi në lajme e nxjerr PSD-në 6%”, thotë Pantina për tesheshi.com.
Deputetja e AAK-së, Time Kadrijaj shprehet se sondazhi në fjalë tregon se qytetarët çdo ditë e më shumë po e përkrahin partinë e tyre dhe sipas saj kjo po ndodh për shkak të qeverisjes së mirë nga kryeministri Haradinaj.
“Për ne është i pranueshëm. AAK po rritet pasi e ka kthyer shpresën e qytetarëve. Ne nuk kemi matje tona të partisë për të parë nëse qëndrojmë edhe më mirë por si struktura e vërejmë që përkrahja për partinë tonë po rritet. Se Aleanca është një subjekt i fortë e tregon edhe fakti se qeverisim me shtatë komuna”, thotë Kadrijaj përtesheshi.com.
Deputeti i NISMA-s, Zafir Berisha nuk e sheh aq real sondazhin e KDI-së duke thënë se matjet e partisë tregojnë për shifra më të mëdha.
“Nëse mbahen zgjedhjet e parakohshme NISMA do t’i fitojë 9 ose 10 deputet në Kuvend. Matjet tona na nxjerrin 8.5 % dhe NISMA tashmë është forcë serioze në vend pa të cilin nuk mund të ketë qeverisje”, thotë Berisha për tesheshi.com.
Portali ynë ka tentuar të marrë përgjigje edhe nga PDK por deputet të saj nuk janë përgjigjur.
Por deputeti i kësaj partie, Fatmir Xhelili në një intervistë për tesheshi.com dhënë në muajin prill lidhur me sondazhet ku PDK-në e nxjerrin të dytën deklaroi:
“Edhe në të kaluarën disa sondazhe nuk e kanë renditur mirë PDK-në por edhe atëherë rezultatet zgjedhore e kanë renditur më mirë PDK-në në zgjedhje se sa në sondazhe. Në zgjedhjet e fundit, e kam fjalën për ato lokale, është dëshmuar fuqia e PDK-së, është dëshmuar që PDK-ja ka një elektorat të etabluar, dhe të qëndrueshëm. Unë nuk dyshoj se edhe po te mbahen zgjedhjet në këtë muaj, PDK-ja nuk do të dilte forca e parë në vend”.
Porali ynë ka dërguar ditë më parë pyetje edhe tek zëdhënësja e Vetëvendosjes, Tinka Kurti për temën në fjalë por nuk kemi marrë përgjigje.
Ndërsa i kontaktuar përmes telefonit, deputeti i kësaj partie Sami Kurteshi ka thënë se nuk është kompetent të flas për këtë çështje dhe se ka parë veç shifrat e publikuara nga KDI por jo mënyrën si është realizuar sondazhi.
Kujtojmë se në sondazhin e KDI-së nuk është përfshirë si parti e veçantë Alenaca Kosova e Re e Behgjet Pacollit as Alternativa e Mimoza Kusari-Lilës, ndërsa Lista Serbe ka dalë me 2 % përkrahje qytetare. /tesheshi.com/
