Bashkia e Tiranës ka nderuar me “Çelësin e Tiranës” kombëtaren tonë të futbollit. Menjëherë pas mbërritjes në aeroport, skuadra jonë ka udhëtuar drejt Bashkisë së Tiranës ku është pritur në një ceremoni të posaçme zyrtare nga banda e qytetit dhe qytetarë të shumtë që kishin dalë për të përshëndetur heronjtë e tyre. Pasi autobusi është ndalur në hyrje të Bashkisë të gjithë futbollistët dhe ekipi drejtues i saj është pritur nga kryebashkiaku, Erion Veliaj dhe drejtuesit e tjerë të Bashkisë së Tiranës.
Kryetari i Bashkisë, Erion Veliaj, në mënyrë simbolike i ka dorëzuar kapitenit, Lorik Cana “Çelësin e Tiranës” në shenjë mirënjohje për kontributin që e gjithë skuadra jonë kombëtare dha në përfaqësimin dinjitoz të vendit tonë në kompeticionin më të rëndësishëm europian të futbollit.
Ndalesa e radhës e djemve të kombëtares do të jetë në Kryeministri, ku shefi i qeverisë do të presë zyrtarisht skuadrën e kombëtares dhe ku të ftuar do të jenë edhe futbollistët më të shquar kuqezi ndër vite. /tesheshi.com/
