Një ndeshje me dy pamje, me një pjesë të parë katastrofike, e me një të dytë më të mirë. Kështu ka luajtur përfaqësuesja kuqezi në të parin takim miqësor në kuadër të përgatitjeve për Europianin e kësaj vere në Francë.
Minutat e para të lojës në Vjenë ndaj një kundërshtari jashtëzakonisht në formë kanë qenë një makth i vërtetë për kombëtaren shqiptare, që pëson dy gola në 13 minuta. Për austriakët shënon fillimisht Janko, e pastaj Harnik.
Tanët kujtohen të shohin nga porta kundërshtare dhe e godasin për herë të parë atë në minutën e 21-të, me anë të Bekim Balës, që topin e gjuajtur me kokë e çon në duart e portierit vendas. Pesë minuta më vonë, Lenjani kërcënon me një predhë nga jashtë zonës. Me pak gjëra të tjera për t’u shënuar, pjesa e parë mbyllet 2-0 për austriakët.
Pjesa e dytë nis po me Lenjanin, që godet fort brenda zonës dhe ngushton rezultatin. 2-1 në minutën e 47-të. Kuqezinjtë, të veshur me të bardha, marrin zemër, e shohin shumë më tepër nga porta kundërshtare. Cikalleshi e Roshi, të futur në lojë në vend të Balës e Lilës, i kanë dhënë tjetër ritëm lojës.
Kaçe prish gjithçka në minutën e 78-të, ku papërgjeshmërisht shkel këmbën e kundërshtarit e del jashtë me të kuqe. Me një lojtar më pak, tanët hasin tashmë vështirësi për të dalë në sulm.
Austriakët dinë ta qetësojnë lojën e ta qarkullojnë topin mes tyre, dhe në fund e detyrojnë Berishën të bëjë dhe një pritje të shkëlqyer.
Pas 90 minutave, gjithçka mbyllet 2-1 për vendasit. Një humbje që djeg, edhe pse thjesht në një miqësore. Më shumë për atë lojë të shëmtuar të pjesës së parë, për ato minuta të para, të interpretuara fare keq, posaçërisht nga mbrojtja e përfaqësueses sonë.
Tradita, sidoqoftë e thotë fjalën e vet. Me austriakët vazhdojmë të thyhemi pareshtur. /tesheshi.com/
