Një raport i Kombeve të Bashkuara thotë se rreth dy milion njerëz kanë humbur jetën në fatkeqësitë natyrore të shkaktuara nga moti dhe kushtet klimatike në 50 vitet e fundit, dhe dëmi material i shkaktuar vlerësohet në 3.6 milion dollarë.
Organizata Botërore Meteorologjike (WMO) dhe disa organizata të tjera nën patronazhin e KB kanë botuar një raport të veçantë me rastin e Ditës Ndërkombëtare për Reduktimin e Rrezikut nga Katastrofat.
Raporti thekson se ndryshimi i klimës ka sjellë katastrofa natyrore më të shpeshta dhe se një e treta e popullsisë së botës nuk ka qasje në një sistem adekuat të paralajmërimit në kohë të një katastrofe të mundshme.
Globalisht, më shumë se 11,000 fatkeqësi natyrore janë regjistruar në pesë dekadat e fundit, në të cilën rreth dy milion njerëz kanë humbur jetën dhe shkaktuar dëme materiale prej 3.6 milion dollarë.
Një kërcënim në rritje për jetën e njerëzve
Sekretari i Përgjithshëm i WMO, Petteri Taalas tha se shumë jetë dhe burime mund të ruhen nga paralajmërimi dhe përgatitja në kohë dhe e duhur përballë katastrofave natyrore.
Duke treguar krizën dhe shqetësimet globale të shkaktuara nga pandemia COVID-19, Taalas tha se ndryshimi i klimës në shekullin e ardhshëm do të paraqesë gjithashtu një kërcënim në rritje për jetën e njerëzve.
Zyra e Strategjisë Ndërkombëtare të KB për Reduktimin e Rrezikut nga Katastrofat (UNISDR) tha se një rritje dramatike e katastrofave natyrore është regjistruar në 20 vitet e fundit.
Në shpjegim thuhet se nga viti 1980 deri në vitin 1999, në botë u regjistruan 4,212 fatkeqësi natyrore dhe se nga viti 2000 deri në vitin 2019, 7,348 katastrofa të tilla ndodhën në botë.
Azia, më e goditura
Azia është kontinenti më i goditur nga katastrofat natyrore në dekada, dhe meteorologët paralajmërojnë se thatësira dhe goditjet e nxehtësisë mund të paraqesin një kërcënim të madh për rajonin në dekadën e ardhshme.
Në dy dekadat e fundit, ka pasur 577 katastrofa natyrore në Kinë, 467 në Shtetet e Bashkuara, 321 në Indi, 304 në Filipine dhe 278 në Indonezi.
Dita Ndërkombëtare për Reduktimin e Rrezikut nga Katastrofat i kushtohet ruajtjes së mjedisit dhe parandalimit të rrezikut nga katastrofat natyrore.
Nisma u nis në 1989, pas një thirrje nga Asambleja e Përgjithshme e KB, e cila e sheh Ditën Ndërkombëtare të Reduktimit të Rrezikut nga Katastrofat si një mënyrë për të promovuar një kulturë të ndërgjegjësimit ndaj rrezikut dhe zvogëlimit të rrezikut, që përfshin parandalimin, zbutjen dhe gatishmërinë e katastrofës.
Deri në vitin 2009, Dita Ndërkombëtare për Reduktimin e Rrezikut nga Katastrofat festohej të mërkurën e dytë në tetor dhe pas vitit 2009, ajo ditë festohet më 13 tetor. /tesheshi.com/
