Masat e izolimit social për shkak të pandemisë koronare mund të rezultojnë në shtatë milion shtatzani të paplanifikuara, sipas të dhënave nga Fondi i Popullsisë së Kombeve të Bashkuara (UNFPA).
Ndërprerjet e zinxhirit të furnizimit mund t’i bëjnë kontraceptivët të paarritshëm për 47 milion gra në vendet në zhvillim, tha agjensia e shëndetit seksual dhe riprodhues të KB.
Analiza e UNFPA gjithashtu parashikon që gjashtë muaj karantinë mund të rezultojë në 31 milion raste të dhunës seksuale, pasi gratë mbeten të bllokuara në shtëpi për periudha të gjata kohe.
Vonesat e programeve që synojnë përfundimin e praktikës së gjymtimit gjenital të grave (FGM) dhe martesave të fëmijëve për shkak të një pandemie vlerësohet të rezultojë në dy milion raste shtesë të FGM dhe 13 milion martesa të tjera të fëmijëve gjatë dekadës së ardhshme, të cilat përndryshe mund të parandalohen, paralajmëron UNFPA.
Edhe pse këto janë vlerësime të përafërta, të dhënat tregojnë “pasojat katastrofike të mundshme të Covid-19 për gratë dhe vajzat në të gjithë botën”, tha shefja e agjencisë së KB, Natalia Kanem në një deklaratë për media.
“Pandemia thellon pabarazitë, duke i vendosur miliona gra dhe vajza në rrezik të humbin aftësinë e tyre për të planifikuar shtatzaninë e tyre dhe për të mbrojtur trupat dhe shëndetin e tyre,” tha ajo.
“Shëndeti dhe të drejtat riprodhuese të grave duhet të mbrohen me çdo kusht,” shtoi ajo. /tesheshi.com/
