Komandanti i marinsave ukrainas që po luftojnë kundër forcave ruse në Mariupol thotë se trupat e tij “po jetojnë ditët e tyre të fundit, nëse jo orët e tyre”, ndërsa Rusia u ka dërguar një ultimatum të ri ushtarëve ukrainas brenda fabrikës së çelikut në qytetin e rrethuar.
“Armiku na tejkalon dhjetë kundër një”, pohon Serhiy Volina nga Brigada e 36-të Detare, i cili të mërkurën bëri thirrje për një tërheqje nga bastioni i fundit ukrainas në Mariupol.
Qindra civilë besohet se fshihen në bodrumet e fabrikës së çelikut Azovstal, shumica në tunele nëntokësore.
Sipas informacioneve ruse, në fabrikën e çelikut ndodhen rreth 2500 luftëtarë ukrainas dhe 400 mercenarë të huaj, ndërsa raportet ukrainase thonë se aty janë strehuar dhe rreth 1.000 civilë.
Nuk është e mundur të verifikohet informacioni i dhënë nga të dyja palët, për shkak të intensitetit të luftimeve dhe ndërprerjes së komunikimeve në Mariupol, i cili u rrethua nga forcat ruse më 1 mars.
Qyteti dhe porti besohet se janë shkatërruar gjatë javëve të gjata të bombardimeve dhe granatimeve ruse.
Javën e kaluar, Rusia e zhvendosi fokusin e operacionit të saj në Ukrainën lindore, pas tërheqjes së forcave të saj nga afërsia e Kievit, e cila përfundoi, siç pretendon Moska, “fazën e parë” të luftës.
Në lajme të tjera, kryebashkiaku i Mariupol tha se po bëhen përpjekje për të evakuuar rreth 6,000 gra, fëmijë dhe të moshuar nga qyteti.
Vadim Boychenko, i cili u largua nga qyteti, pretendon se ka rreth 100.000 civilë në Mariupol dhe se dhjetëra mijëra u vranë.
Rusia u bën thirrje me këmbëngulje ushtarëve ukrainas të dorëzohen, gjë që ata e refuzojnë.
Ministria e saj e Mbrojtjes pretendon se forcat ukrainase janë në Azovstal dhe se janë në një “situatë katastrofike”.
“Apelojmë dhe kërkojmë nga të gjithë liderët botërorë të na ndihmojnë”, tha Volina në video.
“Ne kërkojmë që ata të nxirren dhe të transferohen në territorin e një vendi të tretë”, shtoi ai.
Forcat ruse besohet se kanë depërtuar në të gjithë qytetin dhe disa zyrtarë ukrainas thanë të martën se një spital pranë Azovstali u godit prej tyre.
Volina thotë se rusët kanë “një avantazh në ajër, artileri, forca tokësore, pajisje dhe tanke”.
“Ne po mbrojmë vetëm një objekt, Azovstalin, ku bashkë me ushtarët ka edhe viktima civile të luftës”, tha ai. /tesheshi.com/
