Philip Breedlove, gjenerali amerikan i forcave ajrore dhe shefi i komandës europiane të ushtrisë amerikane, ka deklaruar se Rusia po e ndihmon Beshar Esadin ta kthejë krizën e refugjatëve në një “armë” kundër Perëndimit.
Breedlove i ka bërë deklaratat e tij në një raportim para ligjvënësve amerikanë në Komisionin e Senatit për Shërbimet e Armatosura.
“Rusia dhe regjimi i Esadit po e shfrytëzojnë qëllimisht së bashku emigracionin në një përpjekje për t’i dërrmuar strukturat europiane dhe për ta thyer vendosmërinë europiane,” ka thënë ai para komisionit.
Sipas tij, vala e refugjatëve nga Siria ka patur një efekt destabilizues për vendet europiane, e kjo ka qenë në të mirë të Moskës.
Kremlini dhe Esadi synojnë ta përdorin ta përdorin shpërnguljen e njerëzve si një armë për ta dobësuar unitetin europian, ka shtuar gjenerali. Në këndvështrimin e tij, sulmet ajrore dhe bombat fuçi kërkojnë t’i terrorizojnë sirianët dhe t’i bëjnë të marrin rrugët drejt vendeve fqinje dhe Europës.
Në raportin para komisionit, Breedlove ka ngritur dhe shqetësimin se vala e refugjatëve po maskon lëvizjen e elementëve destabilizues.
Që me marrjen e komandës në vitin 2013, gjenerali Philip Breedlove ka kërkuar një rifortifikim të Europës, duke e quajtur Rusinë një “kërcënim ekzistencial afatgjatë” për SHBA-të. /tesheshi.com/
