Komandanti i KFOR-it, gjenerali italian Salvatore Cuoco, tha se është e rëndësishme të dihet se për çdo iniciativë që ka të bëjë me mandatin e Forcave të Sigurisë së Kosovës, paraprakisht duhet të ketë konsultim me përfaqësuesit e të gjitha komuniteteve në Kosovë.
Pra, sipas tij, NATO duhet të konsultohet për gjithçka që lidhet me mandatin e Forcave të Sigurisë së Kosovës.
“Nëse do të ndryshojë mandati i Forcës së Sigurisë së Kosovës, Këshilli i Atlantikut të Veriut duhet të rishikojë nivelin e angazhimit të NATO-s në Kosovë. Është e rëndësishme që, në çdo iniciative në lidhje me mandatin e Forcës së Sigurisë së Kosovës, duhet të konsultohemi me të gjitha komunitetet në Kosovë dhe aleatët e NATO-s”, tha Cuoco.
Pozicioni i NATO-s në këtë pikë është i qartë, tha gjenerali italian dhe shtoi se Aleanca mbështet FSK-së në, siç theksoi ai, “në mandatin e tyre aktuale”
Sipas tij, Forcat e Sigurisë së Kosovës janë “forca profesionale dhe një burim stabiliteti në rajon” dhe NATO mbetet e angazhuar për sigurinë dhe stabilitetin e Kosovës.
NATO nuk ka ndërmend të ndryshojë ose reduktojë misionin e KFOR-it në Kosovë, por, siç shtoi ai, Aleanca nuk planifikon praninë e saj të përhershme në atë territor.
“Puna e KFOR-it ka qenë gjithmonë në bazë të rrethanave, që do të thotë se çdo ndryshim në numrin e misioneve do të jëtë në varësi të ndryshimit të kushteve në terren”, theksoi Couco.
Ai theksoi se KFOR-i ka komunikim të vazhdueshëm me Forcat e Armatosura Serbe dhe se ky bashkëpunim funksionon mirë në të gjitha nivelet e përgjegjësisë.
Sipas tij, Policia e Kosovës vepron në të gjithë territorin e Kosovës, duke përfshirë Veriun.
Sa për anëtarët e Forcës së Sigurisë së Kosovës, ata kanë nevojë për një licencë të KFOR-it për Veriun e Kosovës.
Kur u pyet në lidhje me situatën aktuale të sigurisë, sidomos pas përplasjes së presidentëve Thaçi e Vuçiç në Gazivodë, Couca tha se situata ishte “e qetë dhe nën kontroll.”
“KFOR-i vazhdimisht monitoron nga afër situatën, por për momentin nuk ka asnjë tregues për ndonjë rritje të tensioneve”, tha ai.
“KFOR është një histori e suksesshme e NATO-s, operacioni më i gjatë me rreth 4,000 ushtarë nga 28 vende aleate”, përfundoi Couco. /tesheshi.com/
