Ushtria ruse po bëhet më e fortë dhe kërcënimi prej saj po rritet, tha shefi i shtabit të Bundeswehr-it, Carsten Breuer. “Ne shohim se ushtria ruse po lëviz drejt Perëndimit,” tha Breuer.
Në pesë deri në tetë vjet, forcat e armatosura të Moskës mund të jenë materialisht dhe personalisht në gjendje të sulmojnë territorin e NATO-s, tha ai për Sächsische Zeitung, cituar nga dpa. Vlerësimet, shtoi ai, bazohen në analizat ushtarake, gjetjet e shërbimeve të inteligjencës dhe forcave të armatosura aleate, si dhe deklaratat e presidentit rus Vladimir Putin.
“Ushtria ruse prodhon 1,000 deri në 1,500 tanke shtesë çdo vit. Pesë vendet më të mëdha evropiane anëtare të NATO-s kanë vetëm gjysmën (të tyre) në magazinë,” tha Breuer.
Bundeswehr, shtoi ai, ka rreth 300 tanke: “Nëse kjo aftësi (ushtarake) kombinohet me qëllimet, të cilat mund të lexohen patjetër nga fjalimet e Putinit, ajo duhet të na zgjojë. Detyra ime është të mendoj për një skenar të tillë të rastit më të keq. Për Bundeswehr-in, kjo do të thotë që ne duhet të jemi gati për këtë mundësi në pesë vjet.”
Breuer vuri në dukje se ai nuk sheh ndonjë tregues të distancimit ushtarak amerikan nga Evropa. Ai mendon gjithashtu se Donald Trump, nëse bëhet sërish president, do të dijë ta njohë vlerën e NATO-s. Ai kujtoi se ndërsa Trump ishte në Shtëpinë e Bardhë, ai “brutalisht” i bëri të ditur Evropës se duhej të forconte kontributin e saj në Aleancë, gjë që ndodhi më së voni pasi Rusia sulmoi Ukrainën.
Krahasuar me vitin 2020, kur vetëm dy ose tre anëtarë të NATO-s arritën udhëzimin e Aleancës për të investuar të paktën dy për qind të prodhimit të brendshëm bruto në mbrojtje, tani më shumë se 20 vende të Aleancës e bëjnë këtë. /tesheshi.com/
