Një komandant kurd në Ushtrinë e Lirë Siriane tha se organizata terroriste e PKK-së “nuk përfaqëson popullin kurd”.
Duke folur për Anadolu, në një intervistë ekskluzive në qytetin veriperëndimor sirian Azaz, Azad Sabo tha se njerëzit e Afrinit ishin lodhur nga dhuna konstante e PYD/PKK-së dhe veçanërisht nga rekrutimi me forcë i të rinjve.
“Ne jemi kurdë dhe jemi luftëtarë, kemi luftuar kundër PKK-së. Ata nuk përfaqësojnë popullin kurd. Ne nuk kemi asgjë kundër asnjë grupi etnik”, tha Sabo.
Sabo tha se kishte jetuar për 12 vjet në Afrin të Sirisë, duke shtuar se PKK ishte përpjekur të mashtronte popullin kurd në Afrin kur erdhi në rajon në vitin 2011. “Megjithatë,” tha ai, “kurdët kuptuan se ata ishin tradhtarë dhe punonin për regjimin e Asadit”.
“Njerëzit e Afrinit mezi po presin ditën kur rajoni do të çlirohet nga PKK-ja. Ata janë si ISIS-i; ata arrestojnë dhe burgosin këdo që qëndron në rrugën e tyre”, tha Sabo.
“Kur ata intensifikuan shtypjen e popullit dhe filluan të rekrutonin vajzat e reja dhe t’i armatosnin … atëhere filloi të shfaqet mizoria e vërtetë e PKK-së”, shtoi ai.
Komandanti kurd gjithashtu vuri në dukje se batalioni i tij kishte arritur të largonte PKK-në nga rajoni Tel Aran në Siri në vitin 2012.
Lidhur me situatën e fundit në Afrin, ku Ushtria e Lirë Siriane dhe Forcat e Armatosura Turke kanë nisur Operacionin “Dega e Ullirit”, Sabo u shpreh optimist:
“Ne do të shohim ditë më të mira … Kemi luftuar kundër forcave të Asadit dhe ISIS-it më parë, tani po luftojmë kundër PKK-së. Kemi filluar me Afrin, dhe shpresojmë se do të përparojmë deri në Qamishli”.
Forcat e Armatosura Turke (TSK) nisën të shtunën Operacionin ‘Dega e Ullirit’ për largimin e të gjithë forcave të PYD/PKK dhe ISIS nga Afrini, me qëllim të krijimit të sigurisë dhe stabilitetit përgjatë kufijve turk dhe rajon. /tesheshi.com/
