Ushtria amerikane po bën absolutisht çdo gjë në fuqinë e saj për të shmangur konfrontimin me Turqinë në Siri, tha të mërkurën komandanti i Komandës Qendrore, përgjegjës për Lindjen e Mesme, gjenerali Joseph Votel.
Ai u tha gazetarëve se ekziston një mekanizëm i koordinimit për të shmangur një skenar të tillë.
Uashingtoni, shtoi ai, pranon se Turqia ka “një shqetësim shumë të ligjshëm mbi sigurinë përgjatë kufirit”, raportoi AP.
Turqia ka nisur kohët e fundit një ofensivë kundër forcave kurde të cilat mbështeten nga Shtetet e Bashkuara në enklavën Afrin në Siri.
Forcat amerikane nuk janë të pranishme në Afrin, por Turqia ka kërcënuar se do të zgjerojë ofensivën në Manbij, ku ushtria amerikane po zhvillon patrullime të rregullta në betejën kundër ISIS-it.
Votel tha se ushtria amerikane do të mbështesë luftëtarët kurdë “për sa kohë që ata vazhdojnë të punojnë për të mposhtur ISIS-in dhe për të parandaluar rimëkëmbjen e tij”. /tesheshi.com/
