Banorët e Kolonjës zgjedhin sot (e dielë) kryetarin e ri të bashkisë. Proçesi ka nisur normalisht, që në orën 07.10 të mëngjesit në të gjitha qendrat e votimit. Ky fakt u konfirmua edhe nga Komisioni Qëndror i Zgjedhjeve.
“Të gjithë qendrat e votimit janë hapur në përputhje me të gjithë proçedurat ligjore të përcaktuara në Kodin Zgjedhor dhe aktet e KQZ-së. Komisioni Qendror i Zgjedhjeve u bën apel të gjithë qytetarëve të Kolonjës, që të t’i drejtohen qendrave të votimit dhe të shprehin vullnetin e tyre me votë”, shkruhet në njoftimin e KQZ-së.
Nga ana tjetër, edhe policia lokale ka shpërndarë materialet zgjedhore në kohë.
“Dorëzimi i qendrave të votimit ka filluar që prej orës 06:00 të mëngjesit, sipas të gjitha kërkesave ligjore, me proçes-verbalet përkatëse të komisionit të votimit. Në të gjithë rrethin e Kolonjës, rreth orës 07:10, ka përfunduar proçesi i dorëzimit. Të gjitha qendrat e votimit së bashku me materialet zgjedhore janë dorëzuar në rregull nga ana e punonjësve të policisë, të cilët më pas janë grumbulluar në ambjentet e përcaktuara, për punonjësit e policisë gjatë proçesit zgjedhor”, thotë policia.
Gara për bashkinë e Kolonjës zhvillohet mes Ilia Stefos, si përfaqësues i Partisë Socialiste, si dhe Dritan Hajros, që përfaqëson të djathtën dhe Partinë Agrare.
Zgjedhjet e pjesshme në Kolonjë po zhvillohen pasi ish-kryebashkiaku Arben Malo ndërroi jetë më 25 shtator nga një atak kardiak./tesheshi.com
