Konfliktit trevjeçar në Jemen i është shtuar tani dhe kolera, një sëmundje që po përhapet me shpejtësi. UNICEF-i vë alarmin teksa thekson se numri i të prekurve nga kolera mund të shkojë në 130.000 brenda dy javëve të ardhshme.
70.000 raste me kolerë në Jemen janë raportuar nga ky organizëm; rreth 600 njerëz kanë ndërruar jetë vetëm në muajin e fundit prej sëmundjes.
Situata e vështirë po kthehet me të shpejtë në katastrofë, sipas kësaj agjencie të OKB-së.
“Kolera nuk ka nevojë për leje për të kaluar një pikë kontrolli apo një kufi, as bën dallim midis zonave të kontrollit politik,” është shprehur drejtori rajonal i UNICEF-it në një vizitë të tij në Jemen.
Zyrtarët e OKB-së paralajmërojnë se kolera do të vazhdojë të përhapet në Jemen nëse nuk do të ketë një ndalim të konfliktit dhe nëse do të mungojnë burimet e duhura financiare.
Miliona jemenas janë gjithashtu në prag të urisë, dhe të kequshqyerit janë të parët që mund ta pësojnë nga kolera.
Sipas Programit Botëror të Ushqimit, thuajse çereku i popullsisë së Jemenit ka nevojë të ngutshme për ndihmë ushqimore.
Sëmundja rrezikon dhe jetën e më tepër se një milion shtatzënave jemenase të kequshqyera, të cilave u nevojitet kujdes i menjëhershëm shëndetësor. /tesheshi.com/
