Kolegët e Televizionit Publik i kanë bërë nderimin e fundit gazetarit Agron Bala, i cili ndërroi jetë pas një sëmundje të rëndë.
Në hollin e Radio Televizionit Shqiptar janë zhvilluar homazhet ku moren pjesë kolegë, drejtues të institucioneve të medias, bashkëpunëtorë, të afërm etj.
Presidenti i Republikës, Bujar Nishani, përmes një mesazh ngushëllimi, vlerësoi kontributin e gazetarit Agron Bala.
“Ai ishte një drejtues i njohur i emisioneve televizive dhe njëri ndër gazetarët e parë të Shqipërisë në selitë e organizatave evropiane në Bruksel. Gazetaria e lirë dhe pluraliste e pas viteve të rrëzimit të diktaturës komuniste, në themelet e saj ka edhe kontributin e jashtëzakonshëm të Agron Balës”, thekson presidenti në mesazhin e tij.
Agron Bala, ishte pjesëtar i një familje qytetare shkodrane dhe veprimtaria e tij si gazetar ka spikatur në RTSH, Radio Kontakt dhe Shijak Televizion, televizioni i parë privat në vend, ku i ndjeri Bala ishte drejtori i parë i tij. Ndërsa përsa i përket krijimtarisë letrare publikoi dhe dy romane.
Kolegu Bala ndërroi jetë ditët e fundit në një spital në Itali, pasi vuante nga një sëmundje e rëndë.
/tesheshi.com/
