Sebastian Vettel fiton garën e 44-t në karrierën e tij, të pestën me Ferrari-n, e të dytën në këtë sezon. Me këtë fitore, ai kryeson i vetëm kampionatin e Formulës 1, duke patur si ndjekës një tjetër ish-kampion si Lewis Hamilton.
Gara e sotme në Bahrejn ka konfirmuar edhe një herë se këtë sezon do të kemi një rivalitet kokë më kokë midis Mercedes-it dhe Ferrari-t, diçka që i jep fund mbizotërimit trevjeçar të skuadrës gjermane.
Garën do ta kryesonte fillimisht Bottas, i ndjekur nga Vettel, që parakaloi Hamilton-in në start. Historia do të merrte tjetër rrjedhë pas xhiros së 13-të, kur një incident në pistë mes Stroll-it dhe Carlos Sainz-it do të sillte daljen e makinës së sigurisë.
Hamilton do të merrte një penallti prej pesë sekondash, Vettel do të merrte kryesimin e garës, për ta përfunduar atë i pari pavarësisht përpjekjeve të britanikut.
Dhjetëshja e parë në finishin e Bahrejnit do të ishte kjo: Vettel, Hamilton, Bottas, Raikkonen, Ricciardo, Masa, Perez, Grosjean, Hulkenberg dhe Ocon.
Vettel kryeson renditjen me 68 pikë, i ndjekur nga Hamilton me 61 pikë. Ferrari është i pari për konstruktorë, me 102 pikë, tre më shumë se Mercedes-i.
Gara e ardhshme është në Rusi, dy javë më vonë. /tesheshi.com/
