Ish-deputeti socialist, Koço Kokëdhima i është kundërpërgjigjur ambasadorit amerikan, Donald Lu i cili e akuzoi një ditë më parë si të korruptuar. Ai jo vetëm e ka quajtur të papranishme akuzën e përfaqsuesit të Uashingtonit, por i kujton atij se ka shkelur etikën edhe diplomatike.
“Me deklaratën e tij ambasadori Donald Lu nëpërkëmbi etikën diplomatike. E bëri pa provë pa asnjë fakt. Gjithë jetën kam punuar në biznesin tim dhe mediat që kam drejtuar janë ndeshur me qeveritë e korruptuara. Kam paguar kostot e kësaj lufte. Kam qëndruar gjithmonë në anën e qytetarëve.
Pasuritë i kam bërë me biznes të ndershëm. Erdha në politikë i pasur për të punuar për vendin dhe për një karrierë të shëndetshme. Shumë të tjerë hynë në politikë të varfër dhe u pasuruan.
Deklaratat e ambasadorit janë të pavërteta. Janë të ndikuar nga ata njerëz që goditën mandatin tim në Gjykatën Kushtetuese dhe nga ata njerëz e intriga që nxijnë sa një ambasadë në ambasadën tjetër.
Intrigat dhe politikanët e ulët të Tiranës nuk mund të vendosin për mua në politikë. Atë e bëjnë vetëm qytetarët”, tha Kokëdhima.
Nga sa kuptohet edhe nga fjalia e fundit e mesazhit të Kokëdhimës, por dhe nga zhvillimet e fundit që shoqëruan vendimin e grupit të PS-së për ta çuar çështjen e tij në Kushtuetuese, e cila nga ana e saj morri një vendim që diktoi dorëzimin e mandatit të tij, distancimi i Kokëdhimës nga maxhoranca dhe sigurisht nga vetë Rama, rezulton dhe një plan amerikan. /tesheshi.com/
