Lufta mes PS-së dhe LSI-së po bëhet gjithnjë e më e ashpër dhe në të gjithë frontet e politikës. Pas një përplasje thuajse çdo javë, në mënyrë inkonjito dy partitë politike të së majtës tashmë po përdorin të gjitha mjetet dhe institucionet për të dëmtuar njëri-tjetrin. Sipas gjasave Shqipëria është afër zgjedhjeve të parakohshme.
Gjykata Kushtetuese ende nuk e ka bërë publike vendimin për mandatin e deputetit të PS-së Koço Kokëdhima, ndërkohë që burime brenda këtij institucioni bëjnë të ditur se 4 anëtarë të këtij institucioni kanë dhënë votat pro heqjes së mandatit të tij, por që nuk dihet ende vota e kryetarit Bashkim Dedja, i cili është anëtari i nëntë i Kushtetueses dhe vota e tij është deçizive në këtë rast.
Opozita me anë të deputetit Eduard Halimi ka deklaruar se Gjykata Kushtetuese e ka marrë vendimin dhe ajo thjesht nuk po e bën publike. Ndërkohë gazeta “Koha Jonë” e cila prej kohësh ka qëndrime pranë LSI-së, akuzon kryeministrin Edi Rama se gjatë muajit janar ka pasur takime me anëtarë të Gjykatës Kushtetuese për të influencuar vendimin e saj për Koço Kokëdhimën.
Mazhoranca ka akuzuar Kokëdhimën se ka përfituar tendera publike ndërkohë që ishte deputet, por akuzat janë hedhur poshtë nga deputeti socialist, i cili ka theksuar se ai ka fituar gara publike kur ishte vetëm biznesmen dhe në krye ishte Partia Demokratike.
Por Gjykata Kushtetuese në një vendim të sajin të 11 dhjetorit ka rrëzuar Kuvendin i cili nuk ka çuar një kërkesë për heqjen e mandatit të Kokëdhimës, duke ia lënë në dorë deputetëve të PD-së. Pikërisht ky vendim ishte një shenjë se dicka po ndodhte.
Dhe sot, në Gjykatën Kushtetuese kishte lëvizje kaotike por mungonte vetëm kryetari i këtij institucioni i cili ishte i angazhuar me një problem familjar.
Pikërisht ky telash njerëzor ka bërë që spekullimet të ngrihen në maksimum duke sjellë opozitën dhe qarqe brenda mazhorancës që të nisin diversionin.
Megjithatë, siç mësohet vendimi i Kushtetueses ka shumë gjasa që të jetë një telash i fortë si për Kokëdhimën ashtu edhe për mazhorancën, pasi pritet ta cilësojë jo normale mungesën e një vendimi të Kuvendit për të kërkuar intepretim të Gjykatës Kushtetuese për çështjen e mandatit të deputetit socialist.
Një burim në këtë institucion theksoi se duhet pritur dispozitivi i vendimit që të mësohet çfarë duhet bërë. Por burimi në fjalë nuk e ka mohuar që kjo Gjykatë nuk ia ka hequr mandatin deputetit Koço Kokëdhima. /tesheshi.com/
