Historia e futjes në politikë të Koço Kokëdhimes është e veçantë në llojin e tij. Nga një ish-sekretar i rinisë në kohën e Partisë së Punës demokracia e gjen si sipërmarrës, por gjithmonë i afërt me politikën dhe një mik i ngushtë i Edi Ramës deri në momentin që bëri “gabimin” për t’u futur në politikë. Politika e prishi një herë e mirë miqësinë mes tij dhe Edi Ramës, por i zbuloi Kokëdhimës pasionin për t’u marrë me politikë aktive. Atij iu hoq mandati nga Gjykata Kushtetuese e më pas u përjashtua nga stukrurat e partisë ku kishte marrë epitetin si “baroni i Jugut” për shkak të ndikimit që kishte në organizimin e strukturave dhe punësimet e militantëve socialistë në gjithë zonën e Jugut të vendit. Njerëzit më shumë e njohin për propozimin e tij për legalizimin e kanabisit, të cilin ai vazhdon t’a mbrojë.
“Po të kisha hyrë 10 vite përpara në politikë do t’i kisha trazuar të gjitha ujërat thotë ai, por edhe tani do t’i trazoj”- thotë Kokëdhima duke besuar se do të fuqizohet politikisht . Më tej Kokëdhima e quan lëvizjen si një “zgjidhje” për problemet e popullit, jo për Partinë Socialiste. Kokëdhima ka krijuar lëvizjen e tij politike “Zgjidhja” e cila shihet më shumë si një fraksion i PS-së se sa si një parti politike më vete.
Nga ligjërimi politik Kokëdhima ka tiparet e një populisti, tipare që i përfaqëson shumë mirë presidenti i ri amerikan Trump, por Kokëdhima dhe pse flet “për dërgimin e pushtetit në duart e popullit të thjeshtë” ashtu si Trump, thotë se nuk frymëzohet prej tij.
Nga biznesi në politikë
Po çfarë ndodhi mes Kokëdhimës dhe PS-së tradicionale dhe çfarë do të bëjë një biznesmen si Kokëdhima në politikë? Me pyetjet e pedagoges së Komunikimit Belina Budini, moderatore e forumit, ai tregon arsyet që e futën në politikë dhe synimet e tij.
“Unë jam i majtë me bindje dhe e njihja politikën, por para se të përfshihesha në politikë nuk e njihja politikën nga brenda. Në 2013 që shkova në Partinë Socialiste si deputet ishte një situatë e paimagjinueshme për një njeri të biznesit: mjedisi ishte agresiv, nuk kishte qetësi, nuk mund të kishte takime që njerëzit të flisnin me normalitet me njëri-tjetrin, njerëzit ishin aq agresivë, shikoja njerëz që kapeshin për flokësh, kuti që fluturonin nga penxherja. Ishte një situatë e paimagjinueshme atje poshtë që tregonte se këta nuk qeveriseshin dhe nuk kishte mirëkuptim”- thotë ai.
Ky ishte momenti që sipas tij imponoi vendimin për të bërë politikën e tij.
“Si njeri biznesi kur konstaton një problem, nuk qan as nuk ankohet, por planifikon një zgjidhje. Në shgtator 2013 kam filluar këtë debat brenda partisë. Si mund të kemi përgjigje për njerëzit për çdo çështje. Ajo që më pengoi është kjo se Partitë politike në Shqipëri dhe baza e tyre, anëtarësia dhe qytetari i thjeshtë nuk kanë asnjë lidhje. Ka një hendek aq të madh mes tyre saqë reflektohet dhe në qeveri. Po ashtu dhe qeveria është aq larg njerëzve, problemeve të tyre saqë duket i pamundur të mbyllet ky hendek”.
Propozimi i tij më radikal është për një ribërje të Kushtetutës së Shqipërisë. ”Një Kushtetutë që është në standardet e një rregulloreje të një instituciuoni. Është me përkufizime që janë larg parimeve dhe mënyrave të gjithëpranuara për ndërtimin e kushtetutave kudo. Së dyti kjo kushtetutë do të duhej që të garantonte moscënimin e sovranitetit kombëtar pasi nuk është diçka që negociohet, është diçka që nuk cënohet kurrë”- thotë ai.
Ku bazohet “Zgjidhja”
Lëvizja e kryesuar nga Koço Kokëdhima ka disa pika bazë që kërkon t’u japë zgjidhje duke kërkuar mbështetje. Ajo kërkon ndër të tjera ndryshim në ligjin për partitë politike që u jep të drejtën anëtarëve të thjeshtë të zgjedhin e të zgjidhen për deputet, këshilltar, kryetar bashkie. “Zgjidhja” kërkon votim dhe numërim elektronik, si dhe administratë zgjedhore jo partiake. Emigrantët të lejohen të votojnë në qendrat e votimit pranë zyrave të konsullatave dhe ambasadave tona.Një pikë e veçantë i kushtohet bujqësisë. “Buxheti i shtetit në mbështetje të bujqësisë jo më pak se 150 mln euro në vit. Subvencione dhe mbështetje për fermerët, siguracione që kanë prime për risqet e dhe dëmet që pësojnë nga forca jashtë mundësive të tyre”-thotë Kokëdhima.
Për emigracionin, një fenomen shqetësues për vendin, “Zgjidhja” propozon që të ngrihet një ministri për diasporën dhe emigracionit duhet t’i rezervohen të paktën 5 vende në parlament, si dhe qeveria të financojë e ndërtojë qendra kulturore në vende ku ka shumë emigrantë shqiptarë.
Më tej kjo lëvizje mbështet legalizimin e ndërtimeve pa leje si dhe pikën më të debatueshme në publik për legalizimin e kanabisit.
“Të diskutohet e vendoset një plan që i mundëson vendit të përfitojë nga ekonomia botërore e kanabisit farmaceutik”- është një nga pikat kryesore të kësaj lëvizje.
I pyetur nëse ka frymëzuar kanabizimin e vendit me deklaratat e tij, ai thotë se kanabizimi erdhi si pasojë e bashkëpunimit të strukturave të policisë me trafikantët dhe lidhjeve korruptive me zyrtarët, ndërsa legalizimi do ta bënte këtë ekonomi legale dhe do ti zhbënte këto lidhje. /tesheshi.com/
