Parlamenti është përfshirë sërish në replika, ndonëse pa praninë e kryeministrit Rama i cili ndodhet në SHBA. Atë e ka dubluar kreu i grupit parlamentar, Taulant Balla, i cili i është përgjigjur kreut demokrat Basha, lidhur me akuzët e këtij të fundit për kokainën e kapur së fundi në Maminas.
“Shqipëria shërben si bazë për përpunimin, paketimin dhe dërgimin drejt tregut europian. Këtë ka patur parasysh dhe DASH dhe Europol ku kanë thënë se Shqipëria në këto vite të qeverisjes së Edi Ramës është kthyer në një bazë të krimit të organizuar. Prej kohësh opozita ka thënë se ka tre laboratorë të përpunimit të drogës në Shqipëri. Cilat janë faktet që Edi Rama, Fatmir Xhafa dhe të tjerë aksionar dhe aksionerë të kokainës mundohen t’i fshehin me çdo kusht e çdo çmim?”, tha Basha.
Por Balla i ka kujtuar atij Lazaratin, në kohën kur qeveriste PD dhe ai, Basha ishte ministër Rendi. “2010 është viti më i dobët në kapjen e heroinës dhe kokainës në Shqipëri, kur ministër i Brendshëm Lulzim Basha. Drogë ka pasur, por nuk ka vepruar policia. Janë kultivuar rreth 2 milionë bimë kanabis, pasi ju keni lënë ministrinë. Policia nuk ndërhynte fare në ato zona”.
Madje sipas kreut të deputetëve socialistë, edhe avionët me drogë që në atë kohë janë shfaqur. “Gjatë viteve 2005-2013 janë raste edhe të personave më status diplomatik për transport droge”, theksoi Balla. /tesheshi.com/
