NATO ka përcaktuar buxhetin ushtarak për vitin e ardhshëm, i cili arrin në gati dy miliardë euro, që është rreth 25 për qind më shumë se për këtë vit.
Aleatët e NATO-s kanë rënë dakord të rrisin buxhetet civile dhe ushtarake të Aleancës për vitin 2023, duke reflektuar ambicie më të mëdha për realitetin e ri të sigurisë.
“Buxheti civil është vendosur në 370.8 milionë euro dhe ai ushtarak në 1.96 miliardë euro, që paraqet një rritje prej 27.8 për qind dhe 25.8 për qind, respektivisht, krahasuar me vitin 2022,” tha NATO.
Duke përshëndetur masën, Sekretari i Përgjithshëm i NATO-s, Jens Stoltenberg tha se rritja e buxhetit ishte “një shprehje konkrete e një niveli më të lartë ambicie” për të arritur qëllimin e vendosur nga aleatët e NATO-s në një samit në Madrid në qershor.
“Ne duhet të vazhdojmë të investojmë më shumë dhe më mirë së bashku në NATO,” tha ai.
Buxheti civil siguron financim për personelin, shpenzimet operative dhe programore të selisë së NATO-s dhe stafit të saj ndërkombëtar.
Buxheti ushtarak mbulon kostot operacionale të selisë, misioneve dhe operacioneve të strukturës komanduese të NATO-s në mbarë botën.
Përveç buxheteve civile dhe ushtarake, kufiri i sipërm për Programin e Investimeve të Sigurisë së NATO-s (NSIP) për vitin 2023 është vendosur në një miliard euro, që paraqet një rritje prej 26.6 për qind. /tesheshi.com/
