“Çdo dash varet për kamsh t’veta, Sali Berisha!”, ishte thirrja me tone të ashpra e Arben Imamit në sallën e konferencës së jashtëzakonshme të PD-së më13 gusht 1992. Iu desh ta përsëriste e ta ngrinte zërin shumë për t’u dëgjuar, në atë kakofoninë mbytëse të thirrjeve të “ushtarëve” të Berishës.
Ishin mbledhur aty pikërisht për t’i bërë gjyqin Arben Imamit e mocionistëve të tjerë të PD-së së asaj kohe. Berisha kishte vendosur t’ja hiqte asaj partie “shenjtërinë demokratike”, edhe pse shumica e shqptarëve ishin aksionerë në atë sipërmarrje aq të madhe të triumfit të lirisë mbi diktaturën. Rezultat i kësaj, është pikërisht PD-ja e sotme, e katandisur gati për t’u zhbërë fizikisht.
Do të ishte pikërisht ajo ditë kur do të niste kthimi pas, drejt diktaturës së brendshme, dhe “dëshmorët” e parë padyshim do të ishin themeluesit.
Dhe historia përsëritet me të njëjtat personazhe. Arben Imami sërish përballë Sali Berishës, si dikur në betejen e parë për demokraci. Imami është përfshirë në listën e gjatë të kundërshtarëve të Lulzim Bashës, pasi PD ka pësuar humbjen më dramatike në historinë e ekzistencës së saj.
Në atë betejë të parë, Imami u mund dhe ka shumë gjasa që edhe në këtë të tashmen humbjen e ka të sigurt. Në atë kohë u përjashtua por Berisha nuk e quante përjashtim:
Berisha: Shiko! Kërkesa jote është e drejtë. Ju nuk përjashtoheni, largoheni. Se nuk ka përjashtim, por ka largim, për të njëjtin problem. Zoti Pashko është larguar me kohë nga Partia Demokratike, kur deklaroi dhe kur krahasoi udhëtimin e Azem Hajdarit me largimin e Ismail Kadaresë, ndonëse shkrimtari ishte kthyer në Shqipëri. Në këtë pikë, unë gjej të arsyeshme që s’ka absolutisht një tendencë për grupim. Kjo është vetëm çështje procedure dhe do të theksohet në vendim, se këta për shkak të mocionit, kurse zoti Pashko për shkak të deklaratave në kundërshtim flagrant me programin e Partisë Demokratike.
Arben Imami: Të qartësohen gjërat.
Eduard Selami: Arben je i nxehur. Qartësimet janë bërë dhe vendimi është i qartë. Procedura është në rregull.
Arben Imami: Ti nuk e kupton procedurën i dashur. Çdo njeri që përjashtohet nga një forum, përjashtohet me një motivacion. Dhe kur t’i propozosh kësaj salle do t’i thuash: Arben Imami, që është ky, ky, ky ka bërë këtë, këtë të keqe, këtë, këtë, këtë të mirë, të përjashtohet nga ky forum. Prandaj, ju lutem shumë respektoni procedurën.
Konferenca miratoi përjashtimin e mocionistëve, ndërsa salla u ngrit në këmbë duke borhoritur: “Sali Berisha, Sali Berisha…”
U përjashtua apo u largua… prej asaj kohe Imami u kthye në armikun e egër të Partisë Demokratike. Mllefi i tij mbërriti kulmin kur u shfaq mbi tank në ngjarjete vitit 1997, në protestat e dhunshme të asaj kohe përballë regjimit të Berishës.
Vojokushizmi i tij do të shpërblehej me post ministri në qeverinë e Fatos Nanos, kundërshtarit të egër të Sali Berishës, në atë kohë. Vitet kaluan dhe erdhi 2005, koha e kthimit të themeluesve. U kthye edhe Imami në partinë e hershme dhe e gjeti atje Berishën, pa asnjë ndryshim, po aq “diktator” sa ç’e kishte lënë.
U shpërblye me poste të larta në parti e qeveri deri në rang ministri. Por largimi formal i Berishës nga PD-ja, i la “jetim” themelues e qëndrestarë, sepse Lulzim basha kishte projektuar largimin e tyre. Dhe ja ku ndodhi. Arben Imami e të ngjashëm me të mbetën jashtë listës së kandidatëve për deputetë dhe menjëherë kanë nisur luftën. Pra, sërish gjeneral, ndonëse jo mbi tank. Ama egërsia është e njëjta, mllefi vojokushas gjithashtu. Kundër Bashës, sigurisht. Por ai e di se përballë ka dhe Berishën në këtë betejë të radhës.
Ja si akuzohej Imami 27 vjet më parë: “Gjatë fushatës së zgjedhjeve të 26 korrikut ai nuk pranoi detyrën e kryetarit të Komisionit Qendror Elektoral dhe mbajti një qëndrim pasiv, duke mos kryer detyrat si nënkryetar i PD-së. Z. Imami në diskutimin e tij, krahas justifikimeve dhe kundërshtive të paargumentuara, paraqiti edhe një mocion apo deklaratë. Z. Sali Berisha propozoi që këtë, ai dhe shokët e tij t’ua lexojnë elektoratit të tyre, sepse kështu populli do të ketë mundësinë të njohë më mirë fytyrat e tyre të vërteta”, thuhej në një deklaratë e PD-së të asaj kohe.
Një tekst të ngjashëm akuzues lexoi këto ditë kryetari i PD-së Lulzim Basha për Imamin e të tjerë themelues e qëndrestarë, të cilët bëjnë fajtor Bashën për humbjen. Basha tha se ata kishin sabotuar fushatën. Por Berisha nuk hyn thellë në këtë debat, të paktën nuk shfaqet publikisht se çfarë mendon për akuzën ndaj Imamit. Ndaj dhe Imami ndoshta duhet ta përsërisë në një farë mënyrë atë shprehjen e hershme: “Çdo dash varet për kamsh t’veta, Lulzim Basha!” /tesheshi.com/
