Shqipëria po përjeton dramën më të madhe në post-komunizëm pas 97-ës tragjike larë me gjak, me shtet të shkërmoqur e ekonomi familjare të rrënuara, por gjithsesi jo me dëshpërimin e sotëm, nën një Shqipëri krejt tjetër nga e djeshmja, më estetike sipërfaqësisht, por më në dramë thelbësisht, nga humbja e shpresës dhe prirja e çmendur për ikje, ikje, ikje, deri në nivele të paimagjinueshme shpopullimi.
E nën këtë klimë të rënduar sociale, njeriu që qeverisë këtë Shqipëri që po zbrazet, kryeministri Rama, realizon një podcast me slloganin “Koha për t’u kthyer”, duke biseduar me tre të kthyer nga emigracioni, nga vende të ndryshme të Shqipërisë. Dhe aty, njërës prej tyre i referon të aplikojë për “Paketën e Maleve”, një projekt për kapitalizim ekonomik të resurseve natyrore nëpërmjet investimeve me fokus turistik. Por më parë nuk sqaron se ç’rezultat ka dhënë projekti i “100 fshatrave”, promovuar me bujë pak vite më parë.
Sipas disa investigimeve mediatike, ky projekt pothuajse ka dështuar edhe aty ku është aplikuar, pa llogaritur faktin se në të shumtën e fshatrave të përzgjedhur nuk është aplikuar fare.
E paçka kthimeve spiradike, ato nuk janë frymë, siç në vitet 2006, 2007, 2008, 2009, për ironi kohë kur qeveriste Berisha, pasi mbi to po prevalon ikja frenetike, e pafrenueshme dot, pa qenë nevoja për statistika. Boshatisja e Shqipërisë është tashmë e dukshme me sy të lirë. Qytetet e rilindura urbane po shndërrohen në fantazma ekonomike e sociale dhe Rama nuk kanë asnjë përgjigje, nuk jep asnjë lloj prognoze për atë që ato mund të ripopullohen një ditë.
Krahasimisht me 97-ën, nëse nga ajo gjëmë Shqipëria u rehabilitua shpejt, në pak vite, me shtet të ringritur e ekonomi të ristabilizuara, edhe me entuziazëm shoqëror paralel me trishtimin e dhimbjen për atë që ndodhi, gjëma e sotme e ikjeve, shpopullimit, duket më e rëndë se 97-ta pikërisht nga mungesa e çdo entuziazmi shoqëror. E kundërta është madje: një dëshpërim i thellë shoqëror, nën bindjen ende të përforcuar se ky “vend nuk bëhet”. Ndodhur kjo cinikisht nën qeverisjen e atij ku shqiptarët panë njeriun e shpresës së ky vend mund të bëhet: Edi Ramës. /tesheshi.com/
