Hashim Thaçi, që nga marrja e postit të presidentit të vendit, në shkurt të këtij viti, pothuajse në të gjitha paraqitjet e tij publike, bëri që edhe Kosova të bëhet pjesë e familjes së shteteve që kanë dekriminalizuar skenën politike dhe institucionet e tjera, qoftë ato të zgjedhura me votën e qytetarëve apo të emëruara në bazë të ligjeve dhe Kushtetutës.
Presidenti gjatë takimit të dytë për reformën zgjedhore, në të cilin nuk ka qenë i pranishme, opozita ka paralajmëruar se do të propozojë një kod për dekriminalizimin e politikës të nënshkruar nga përfaqësuesit apo liderët e partive politike, ku asnjë kandidat që ka aktakuzë të çfarëdollojtë, nuk do të jetë në listën për deputet të Kuvendit të Kosovës dhe nuk do të jetë kandidat për kryetar komune, për asamble komunale.
“Këtu do të kemi një debat më të gjerë dhe do të mund të na ndihmonin të gjitha partitë politike, shoqëria civile dhe përfaqësuesit ndërkombëtarë. Me ligj është e pamundur që të rregullohet kjo çështje, por me një kod të nënshkruar nga partitë politike për njëlloj dekriminalizimi të skenës politike. Nuk është skena siç pretendohet ndonjëherë, por mendoj se duhet të ndihmojmë që të kemi një profilizim më të qartë dhe një rritje të nivelit e cilësisë në Republikën e Kosovës”, ka deklaruar Thaçi.
Por, shtrohet pyetja, pse Hashim Thaçi nuk bëri ligjin për dekriminalizimin kur drejtoi qeverinë për dy mandate?
Ky propozim i presidentit aktual do të mund të merrej seriozisht vetëm nëse Thaçi sa ishte kreytar i PDK-së të merrte vendim të largonte nga pozita disa bashkëpartiak të tij, që përkundër aktakuzave, apo edhe dënimeve me vendime të plotfuqishme, ata vazhdojnë të kryejnë funksionet e tyre publike, një prej tyre është kryetari i Prizrenit, Ramadan Muja, por jo vetëm.
“Lojë e Thaçit për ta zgjatur karrierën e tij politike”
Duke parë mos reagimin e Thaçit në kohën sa ishte kryeministër i vendit, propozimi i bërë së fundmi nga ai, po shihet nga partitë politike sidomos ato opozitare, si një ide e bërë për qëllime të caktuara politike, por jo që të fillojë vërtetë pastrimi i skendës politike nga individë, me të kaluar të inkriminuar.
Deputeti i LDK-së, Adem Salihaj, lidhur me propozimin e bërë nga Thaçi për dekriminalizim, thotë se një person i “zhytur” në krime nuk mund ta bëjë dekriminalizimin e institucioneve.
“Kjo është vetëm edhe një lojë e tij për t’i mashtruar për të disatën herë qytetarët e Kosovës dhe për t’ia zgjatur ende jetën karrierës së tij politike. Presioni ndërkombëtar për luftimin e krimit po rritet dhe Thaçi, i cili në fakt është kapoja e krimit, po mundohet të duket si luftuesi i tij. Qytetarët e Kosovës nuk duhet të bien më në këto gracka të Hashim Thaçit. Është koha të luftohet kundër krimit të organizuar”, thotë Salihaj, për tesheshi.com.
“Propozimi i Thaçit për dekriminalizimin për të mbijetuar politikisht”
Edhe partitë opozitare, propozimin e Thaçit që të nënshkruhet një kod nga partitë për dekriminalizimin, e shohin si një lojë të qëllimshme, që të mbijetojë politikisht.
Ismajl Kurteshi, deputet i Lëvizjes Vetëvendosje, thotë se kur të korruptuarit angazhohen ta luftojnë korrupsionin, e të “zhyturit” krimin, atëherë mund të konkludohet se bëhet me synim, që të krijohet “mjegull” dhe për të mbijetuar politikisht.
Ai kërkon një dekriminalizim të vërtetë të institucioneve, si dhe duhet një përgatitje e mirë, një debat i gjerë dhe njëkohësisht duhet të mos lejohet “lulëzimi” i krimit, si dhe të merren masa ndaj atyre që janë pjesë e krimit.
“Të gjitha propozimet e bëra nga presidenti, edhe për reformë zgjedhore, edhe për kodin për dekriminalizim janë vetëm disa veprime, që dikush i bën kur është në panik dhe mundohet disi të mbijetojë. Nuk mendoj se të gjitha këto propozime janë serioze, e as që e kanë kohën. Për këto proçese, duhet një kohë shumë më e gjatë dhe më serioze. Unë mendoj se për dekriminalizimin duhet të punohet vazhdimisht, por të intervenohet në mënyrën, si po bëhet për të arritur qëllime djallëzore nuk sellin asgjë të mirë në këtë vend. Propozimi i bërë nga Thaçi besoj se nuk ka të bëjë aspak me pengimin e krimit, por me arritjen e disa synimeve absurde të zotnisë që është president”, thotë Kurteshi, për tesheshi.com.
Edhe Ahmet Iusfi nga Aleanca për Ardhmërinë e Kosovës (AAK) mendon se dekriminalizimi nuk mund të ndodhë me njerëzit që e kanë instaluar krimin dhe korrupsionin në institucionet e vendit.
“Ata që e kanë instaluar në qeveri dhe institucione korrupsionin nëse kanë dashur të bëjnë dekriminalizimin kanë mundur ta bëjnë një gjë të tillë, duke qenë në pushtet për dhjetë vite me radhë. Me këtë qeveri nuk mund të ndodhë dekriminalizimi. Së pari, duhet të shkohet në zgjedhje të jashtëzakonshme dhe të foromohet një qeveri, që para se gjithash, ka interesant e vendit”, thotë Isufi, për tesheshi.com.
Nga Blendi Gashi/tesheshi.com
