Pas deklaratave provokuese të ministrit të Mbrojtjes në Greqi, Panos Kamenos ka ardhur edhe reagimi i homologes shqiptare, Mimi Kodheli. Ajo është treguar e ashpër me zyrtarin grek në një postim në facebook, një ditë pasi ai tha se shteti grek nuk mund të pranojë sfida dhe referenca që ndikojnë në historinë dhe të drejtën ndërkombëtare.
“NATO u krijua për të bashkuar vendet demokratike të hemisferës veriore përballë çdo rreziku totalitar. Por sot e kam të vështirë të kuptoj pse ndonjë politikan në Ballkan vesh uniformë ushtarake dhe përpiqet të ngrejë fantazma të së shkuarës. Kanë ikur kohët e satrapëve”, shkruan Kodheli.
Ajo e përfundon postimin e saj me një mesazh sensibilizues duke shkruar “Give peace a chance (Jepini paqes një shanc)”.
Teksa ndodhej në një zonë afër kufirit jugor që ndan Shqipërinë me Greqinë, Kamenos tha se deklaratat e kryeministrit Edi Rama janë sajesa qe s’kanë lidhje me historike. “Na sjellin përsëri ne kujtesën tone bashkëpunëtoret e nazisteve. Ata ishin humbës ne lufte. Ne nuk do të pranojmë sfida të tilla dhe nuk do të pranojmë raporte të tilla, të cilat dëmtojnë historinë dhe të drejtën ndërkombëtare”, deklaroi nga garnizoni ushtarak kufitar në Molivdoskepasti, në Epir, ministri grek./tesheshi.com/
