Pas heqjes së mandatit të deputetit Koço Kokëdhima, një nga njerëzit më të afërt të Edi Ramës për shumë vite ka ndryshuar totalisht qëndrim dhe është bashkuar thuajse identik me politikën që po mban LSI-ja e Ilir Metës.
Në dy komente; një të botuar në faqen e Facebook-ut të Kokëdhimës dhe një në gazetën “Shekulli”, pronë e ish-deputetit socialist, është trajtuar një qasje e qartë që bie në kundërshtim me politikën e Kryeministrit Edi Rama.
Ja ç’shkruan Kokëdhima në një koment të botuar në faqen e tij në Facebook:
“Është e pashëndetshme dhe e papërshtatshme për Shqipërinë, që shumica jonë parlamentare ta çojë reformën për drejtësi në Parlament, me idenë se do t’i “kaparosim” dy-tre deputetë besëthyer nga grupi i opozitës. Reforma për drejtësi duhet të shkojë në parlament me konsensus të opozitës dhe vetëm pasi drafti i ndryshimeve të kushtetutës të jetë në përputhje me standardet e kushtetutave të demokracive të tjera parlamentare të BE-së. Kjo do t’i shërbejë forcimit të paqes dhe integrimit real të Shqipërisë në Bashkimin Europian. Rruga që kërkojnë disa për ta bërë reformën pa opozitën, është rruga e rrezikimit të paqes së vendit dhe e shkatërrimit të bashkëpunimit dhe dialogut politik. Kështu do të komprometohej edhe arsyeja e supozuar se, urgjenca e miratimit të reformës është e lidhur vetëm me hapjen e negociatave për anëtarësimin e Shqipërisë në BE.
Reforma duhet të bëhet në rrugë kushtetuese dhe legjitime. Kjo nuk do të thotë se Saliu dhe PD-ja kanë të drejtë të mbajnë peng vendin. Kur ka vullnet dhe strategji për t’i bërë gjërat si duhet, dhe kur palët u dalin për zot, secila përgjegjësive të veta, janë ose gjenden edhe rrugët e mira për ta realizuar edhe reformën në drejtësi, edhe reformat e tjera. Drafti i reformës së drejtësisë duhet të jetë në përputhje me kriteret e mirëpranuara ndërkombëtarisht për ndërtimin e kushtetutave të vendeve demokratike dhe në respekt të kulturës, përvojës, traditës dhe të sovranitetit të vendit.
Por nuk mbaron me kaq. Në një koment të sajin Shekulli sulmon ashpër si Edi Ramën, por edhe Saimir Tahirin.
Në argumentin e saj gazeta e Koços bashkohet me qëndrimin e LSI-së, por edhe të Partisë Demokratike.
Madje shumë afër me atë që Sali Berisha, akuzatori më i madh i Kokëdhimës, ka mbajtur deri tani.
“Trupi gjykues që vendosi për heqjen e masës së pezullimit ndaj drejtorit të përgjithshëm të Policisë së Shtetit kryesohej nga Marie Qiriazi dhe në përbërje ishin edhe gjyqtarët Ervin Metalla dhe Fiqirete Mullai.
Për të marrë një vendim, duhet vota e së paku dy anëtarëve ndër tre.
Po cilët janë gjyqtarët që kanë vendosur në favor të Çakos?
Mediat raportojnë se Marie Qiriazi ka qenë gjyqtare e Kolegjit Zgjedhor dhe mori akuza nga e majta, në atë kohë në opozitë, për vendime të njëanshme gjatë zgjedhjeve vendore 2011.
Pra, Partia Socialiste, atëherë në opozitë, e ka denoncuar Qiriazin si ‘të kapur’ nga demokratët”.
Me këtë qëndrim mund të thuhet pa droje se kemi një divorc gati final të Koço Kokëdhimës me Edi Ramën. Që do të thotë se “Pashai Jugut” siç e thërret PD-ja, e ka të mbyllur çështjen e kandidimit për deputet në 2017. Mos po kalon me LSI-në?! Marrëdhëniet e tij me Ilir Metën, nuk janë prishur asnjëherë…/tesheshi.com/
