Radikalët e partisë Syriza në Greqi zotohen të punojnë për moszbatimin e marrëveshjes që kryeministri i dalë nga kjo parti, Aleksis Cipras nënshkroi me kreditorët e që përfshin reforma dhe masa kursimi. Në një tubim mbrëmjen e vonë të së hënës, rreth 2 mijë mbështetës të Syriza-s kërkuan zbatimin e “jo” referendare kundër masave të kursimit. Protesta vjen në kohën kur në Athinë sapo kanë nisur bisedimet me përfaqësuesit e kreditorëve që kërkuan reforma të tjera nga Athina.
Marrëveshja, e nënshkruar më 13 Korrik dhe e votuar në parlamentin grek 3 ditë më vonë, parashikon një paketë të re ndihme prej 93 miliardë eurosh në këmbim të një serie reformash ekonomike.
Që masat e kursimit të parashikuara në paketën e ndihmës të kalonin në parlament, kryeministri Cipras u mbështet në votat e opozitës pasi një pjesë e madhe e deputetëve të partisë së tij dolën kundër marrëveshjes.
Kështu, në tubimin e protestës lideri i platformës së Majtë, Panagiotis Lafazanis dha një fjalim të zjarrtë, ku u zotua se grupi i tij do të luftojë kundër zbatimit të reformave të detyrueshme nga paketa e shpëtimit.
Lafazanis, që u shkarkua nga detyra e ministrit të Energjetikës për shkak të votës kundër paketës së ndihmës në parlament, akuzoi Cipras se ka tradhtuar partinë dhe idealet e së Majtës.
Ai iu referuar “jo”-së në referendum duke thënë se nuk bëhet fjalë për një stuhi kalimtare e ata që e mendojnë kështu gabohen. Sipas tij, Greqia përballet me një luftë të ndyrë të koordinuar nga interesa të huaja.
Lafazanis sfidoi lidershipin e Cipras duke thënë se numri iI zërave disidentë është në rritje dhe ata do të mposhtin zbatimin e paketës së ndihmës. /tesheshi/
