Çdo ditë e më shumë po thellohen përçarjet mes dy partive në qeverisje PDK dhe LDK duke paralajmëruar kështu se i ashtuquajturi “koalicioni i elefantëve” po shkon drejt shembjes.
Së fundmi zv.ministri i Financave Isni Kilaj nga radhët e PDK-së ka hedhur akuza në drejtim të ministrit të LDK-së Avdullah Hoti, për shkelje të ligjit për mos ndërrimin e pozitave në Administratën Tatimore.
Sipas Kilajt, ministri Hoti është duke anashkaluar ligjin për zbatimin e vendimeve të gjykatës.
Kilaj thotë se Hoti nuk ka zbatuar asnjë vendim as të Këshillit të Pavarur Mbikëqyrës për kthimin në punë në pozitat paraprake për disa zyrtar të ATK-së të larguar.
“Ministri i Financave Avdullah Hoti po anashkalon zbatimin e Vendimeve të Gjykatës Themelore në Prishtinë. Ministri i Financave Avdullah Hoti nuk ka zbatuar asnjë Vendim të Këshillit të Pavarur Mbikëqyrës të Kosovës për kthimin në punë në pozitat paraprake për disa zyrtar të ATK-së të larguar padrejtësisht nga ish ushtruesi i detyrës së Drejtorit të ATK-së Nait Sharku si të; Bekim Gashi,Blerim Hamiti, Halide Pireva, Diamanta Skenderi, Shaqir Totaj,Valdet Bektashi etj. Vendimet e këtij Këshilli janë obligative për të gjitha institucionet në Republikën e Kosovës por jo edhe për Ministrin Hoti”, ka thënë Kilaj, raporton Indeksonline.
Kilaj konsideron se Hoti ka krijuar pasiguri dhe pakënaqësi te zyrtarët e Ministrisë së Financave, por edhe pasiguri në mes të koalicionit.
“Por më e rënda është se as Vendimet e Gjykatës Themelore në Prishtinë nuk janë obligative për Ministrin Hoti. Gjykata Themelore në Prishtinë me Vendimet e datës 04.05.2016 /Nr.07-06-1279,78…/ka kthyer në punë në pozitat paraprake ish zyrtarët në Departamentin e Tatimpaguesve të Mëdhenj: Bekim Gashi, Blerim Hamiti, Halide Pireva e Diamanta Skenderi. Por Vendimet nuk janë implementuar. Ky veprim i Ministrit Hoti ka krijuar pasiguri dhe pakënaqësi te zyrtaret në Ministrinë e Financave por edhe një pasiguri qeverisjeje të partnerëve të koalicionit pasi që kjo po bëhet në baza partiake”, ka thënë Kilaj. /tesheshi.com/
