Lëvizja Socialiste për Integrim është e hapur për koalicion opozitar. Kështu u shpreh Monika Kryemadhi, Kryetare e LSI, duke iu përgjigjur pyetjes për një koalicion opozitar mes forcës politike që drejton dhe Partisë Demokratike.
Kryemadhi pohoi se LSI është e hapur për një front opozitar pa dallime ideologjike.
Sipas saj, vendi ka nevojë për një opozitë të fortë, pasi në këtë mënyrë do të kemi një qeverisje të mirë, do të kemi demokraci.
E ftuar në studion e Abcnews, Kryemadhi komentoi edhe marrëveshjen e 17 Majit mes Kryeministrit Edi Rama dhe kreut të PD-së, Lulzim Basha.
Sipas saj, kjo marrëveshje dëmtoi jo vetëm PD, port ë gjithë spektrin politik, që është i paqartë mbi atë që po ndodh për shkak të një marrëveshjeje jo transparente.
“PD humbi 200 mijë vota nga zgjedhjet e kaluara. Mënyra sesi u luajt marrëveshja e 17 majit ka të bëjë me dy aktorët e saj, por aleanca dëmtoi shumë PD”, tha Kryemadhi.
Kryetarja e LSI ka komentuar edhe dëgjesat e Kryeministrit Edi Rama me qytetarët, duke i cilësuar ato si një tërheqje vëmendjeje nga farsa e zgjedhjeve të 25 Qershorit.
“Për mua s’janë më dëgjesa, por një skenar i ndërtuar për të bërë gjyqet e popullit. Më ngjajnë me lajme vere që duan të heqin vëmendjen nga farsa e zgjedhjeve të 25 qershorit, se edhe mediat edhe njerëzit merren me politikanët e korruptuar, jo me atë që ka ndodhur. Një lloj propagande, makina e propagandës e PS ka ecur gjithmonë mirë për të bërë marketing lajmesh”, tha Kryemadhi. /tesheshi.com/
