Partia e minoritetit serb në Kosovë, Lista Serbe ende nuk ka vendosur cilit koalicion do t’i bashkohet pas zgjedhjeve parlamentare të jashtëzakonshme të 11 qershorit. Kështu ka bërë të ditur nënkryetari i kësaj partie Slavko Simiq.
Duke komentuar spekulimet për formimin e Kuvendit e të qeverisë gjatë kësaj jave, Simiq ka thënë se kjo është e pamundur.
“Sa i përket mbajtjes së mbledhjes konstitutive, ende nuk është caktuar mbledhja e Kryesisë në të cilën do të caktohej seanca, ende nuk janë regjistruar deputetët ashtu që në mënyrë procedurale, sipas meje, është e pamundur që gjatë kësaj jave të mbahet seanca konstituive e Kuvendit”, citon radiokim të ketë thënë Simiq.
Kujtojmë se Lista Serbe ka nëntë deputetë dhe do jetë vendimtare në formimin e qeverisë së re.
