Bashkimi Europian ka bërë të ditur se tashmë negociatat me Shqipërinë janë drejt hapjes.
Eurodeputeti gjerman, Knut Fleckenstein, që është edhe reporter i Parlamentit Europian për Shqipërinë, deklaroi në një intervistë për ABC News, se zgjedhjet e 25 qershorit ishin një “test pozitiv”.
“Ne kemi thënë që ka dy pika që duhen plotësuar për hapjen e negociatave. Zgjedhjet dhe fillimi i zbatimit të proçesit të Vettingut. Ne duhet t’i përmbahemi kësaj dhe të hapim negociatat sa më shpejt të jetë e mundur. Kriteret e tjera sigurisht që duhen diskutuar, por kjo mund të bëhet gjatë negociatave. Unë i kërkoj Komisionit Europian dhe Këshillit të ministrave që të hapin negociatat e anëtarësimit me Shqipërinë. Kemi shumë për të bërë, por mendoj se Shqipëria e meriton hapjen e negociatave të anëtarësimit.
Ne kemi qenë të qartë për kushtëzimin para hapjes së negociatave. Tani duhet të mbajmë fjalën e dhënë.
Komisioni dhe shtetet anëtare duhet të tregohen të besueshme dhe të hapin negociatat tani”, tha Fleckenstein.
Ai, përveç se një eurodeputet i spikatur është një politikan i rëndësishëm në Gjermani, pjesëtar i Partisë Socialdemokrate që është në koalicion me kancelaren Angela Merkel. /tesheshi.com/
