Europarlamentari, Knut Fleckenstein, shprehet në favor të hapjes së negociatave mes BE dhe Shqipërisë, ndërsa apelon që të mos vendosen me kushte penguese.
Reforma në drejtësi, vettingu dhe zgjedhjet ishin kushte paraprake, që u realizuan tha Fleckenstein, duke shtuar se Komisioni duhet të veprojë.
Referuar deklaratës së Presidentit Juncker, europarlamentari shprehet se nuk ka ndonjë lajm të ri, pasi të gjithë e dinim se në këto pesë vite nuk do të ketë anëtarësime të reja, raporton Klan Plus.
“Negociatat duhet të vijojnë, madje duhet të nxitojmë pas zgjedhjeve të ardhshme evropiane. Me Shqipërinë duhet të nisim sa me shpejt negociatat.
Ata nuk më kanë dhënë datë konkrete. Jo veten unë por edhe Parlamenti Evropian kërkon që komisioni të veprojë tashmë. Kishim kërkuar të niste reforma në gjyqësor, Vettingu, zgjedhjet që u realizuan mirë.
Pra siç e shihni janë realizuar kushtet paraprake. Çështjet më themelore mund të trajtohen gjatë negociatave, por nuk mund të shtojmë çështje të tjera penguese në këtë moment”, tha ai. /tesheshi.com/
