Këshilli për Mbrojtjen e të Drejtave dhe Lirive të Njeriut (KMDLNJ) u ka bërë thirrje partive politike në Kosovë që të zhbllokojnë situatën e krijuar për krijimin e institucioneve të vendit, në të kundërt propozon vajtjen në zgjedhje të jashtëzakonshme.
Duke kujtuar se raporti i forcave parlamentare është 60 me 60 dhe kur asnjëra palë nuk e ka shumicën parlamentare, KMDLNJ konstaton se është krijuar ngërç politik, ndërkohë që sipas interpretimit të Gjykatës Kushtetuese të vitit 2014, në mënyrë eksplicite thuhet se koalicioni parazgjedhor fitues apo subjekti fitues, ka të drejtën e vetme të propozojë kryetarin e Kuvendit.
KMDLNJ thekson se mospjesëmarrjet në seancat konstituive janë të papranueshme, pasi ato e dëmtojnë rëndë interesin e qytetarëve. Në këtë kuadër, u bëhet thirrje deputetëve të marrin pjesë në vazhdimin e seancës konstituive më 24 gusht, në mënyrë që të përmbushin detyrimin kushtetues.
“Zhbllokimi duhet të bëhet me një marrëveshje politike, pavarësisht se kush do të jenë palë të marrëveshjes. Koalicionit PAN, si fitues i zgjedhjeve të fundit i takon kryetari i Kuvendit dhe përpjekja e parë për formimin e qeverisë, që nuk nënkupton se procesi mund të zvarritet deri në pafundësi, sikur LV dhe LAA duhet t´a kenë të qartë se nuk mund të bëhet asnjë veprim drejt formimit të qeverisë pa u zgjedhur organet drejtuese të Kuvendit dhe nuk kanë asnjë të drejtë që duke përdorur shantazhin si mjet politik të pengojnë zgjedhjen e organeve drejtuese të Kuvendit duke bllokuar proceset tjera”, thuhet në deklaratë.
KMDLNJ konsideron se presidenti Hashim Thaçi duhet t’u japë një afat kohor jo më shumë se një javë që të arrihet një pajtim për formimin e institucioneve, në të kundërtën duhet ta shpërndajë Kuvendin duke shpallur zgjedhje të jashtëzakonshme .
“Disa subjekte politike, ngërçin politik që vetë e kanë krijuar po e keqpërdorin për të provokuar zgjedhje të reja . Është përgjegjësi kushtetuese e presidentit të Kosovës të ndërpresë këtë lojë të pandershme të subjekteve politike duke ofruar zgjidhje”, vijon deklarata.
KMDLNJ kërkon gjithashtu që pas formimit të institucioneve funksionale, të rishqyrtohen të gjitha emërimet dhe shkarkimet në poste ekzekutive apo pozita të tjera të larta, pasi është favorizuar “kualifikimi” politik dhe është dhunuar profesionalizmi që do të duhej të ishte kriteri themelor për emërime apo shkarkime.
Gjithashtu u bëhet thirrje deputetëve të Kosovës të kontribuojnë në zhbllokimin e situatës dhe funksionalizimin sa më të shpejtë të institucioneve, në të kundërtën do ta bartin përgjegjësinë për bllokimin institucional. /tesheshi.com/
