Nga Mensur Krasniqi
Një frazë e njohur juridike thotë “Drejtësia vonon por asnjëherë nuk harron”. Kështu sot Gjykata Themelore në Shkup pas një zvarritjeje 8-mujore, solli një vendim të favorshëm gjyqësor për Shoqatën për Edukim Arsimor dhe Kulturor “Klubi ELITA” mbi çështjen ligjore mes tyre dhe Komunës së Çairit lidhur me objektin që në bazë të kontratës së përbashkët e ka në shfrytëzim “Klubi ELITA”, ndërsa të njëjtën zyrtarët e Komunës së Çairit e uzurpuan dhunshëm pa të drejtë ligjore.
Sipas këtij vendimi i padituri KOMUNA ÇAIR Shkup obligohet që menjëherë ta rivendos gjendjen e mëparshme të menaxhimit, në mënyrë që do t’i mundësojë paditësit qasje të papenguar dhe menaxhim me objektin e zyrës dhe oborrin e saj, të marrë me qira.
Me këtë vendim kryetari i kësaj shoqate, Qemal Krosi gjykon se drejtësia erdhi në vend dhe turpi i përdorimit të dhunës i mbeti Komunës së Çairit, gjegjësisht Izet Mexhitit dhe të dërguarve të tij, Rami Qerimi dhe Ejup Ademi.
“Përkundër asaj se ata e keqpërdorin institucionin dhe nxisin vëllavrasjen, vetëm për shkak të kapricieve të tyre për prona publike, ne nuk u bëmë viktima të atyre provokimeve dhe nuk lejuam që askush të lëndohet.
Por, nuk mund t’u ndihmojmë më shumë që edhe të mos turpërohen. Më shumë se kaq nuk mund të bëjmë. Sot drejtësia u rivendos dhe aktivitetet e zhvendosura në lokale të tjera së shpejti do të rikthehen në Qendrën Arsimore “Klubi ELITA”, për tesheshi.com u shpreh Qemal Krosi.
Ai gjithashtu nëpërmjet tesheshi.com informon që në bazë të marrëveshjes objektin në fjalë “Klubi Elita” e ka në përdorim deri në maj të vitit 2017( duke mos e llogaritur edhe kohën nga procesi gjyqësor aktual gjatë të cilit objekti ka qenë i mbyllur). Pranda, sipas Qemal Krosit, ata do të vazhdojnë aktivitetet e parapara deri në afatin e paraparë juridik. /tesheshi.com/
