Pavarësisht se vëmendja e merkatos së futbollit botëror, lëviz pa rregull, nga Spanja në Angli, e pastaj Gjermani e Francë, në Itali, emrat e shqiptarëve që luajnë me kombëtaren, kanë lakime të disafishta, përsa i përket dëshirës së klubeve për t’i patur në përbërje.
Ledian Memushaj ka ngjitur disa shkallë në listën e dëshirave të Bolonjës, e cila nga ana tjetër, duhet “të ruhet” për mesfushorin shqiptar, edhe nga “të uriturit” e Beneventos, të ngjitur për herë të parë në histori, në Seria A. Por Benevento pëlqen shumë edhe qendërmbrojtësin Berat Gjimshiti, i cili zhvilloi një sezon të shkëlqyer me Ascolin në kategorinë e dytë italiane, edhe pse është në pronësi të Atalantës.
Për shtatlartin shqiptar, ka së fundmi edhe një interes të fortë nga Chievo, përvec ofertave disi “më inferiore” të Cesena-s dhe Crotone-s, nga Serie B. Megjithatë, të dy futbollistët, kanë një “admirues” të veçantë tek Sioni i Zvicrës, trajnerin Paolo Tramezani, që dikur i stërviste shqiptarët në Kombëtare.
Ndërkohë po nga Italia, është njoftuar “sistemimi” zyrtar i portierit Etrit Berisha me Atalantën, e cila pasi e huazoi për gjysëm sezoni, ka paguar klauzolën prej 5 milion eurosh për blerjen e tij përfundimtare nga Lazio. /tesheshi.com/
