Isa Mustafa shpërthen kundër fizikantit shqiptar, Fatos Klosi, i cili ka qenë për 4 vjet shef i shërbimit sekret shqiptar, kryesisht gjatë kohës së Luftës së Kosovës.
Fatos Klosi, i cili ka marrë emërtimin e “veteranit të UÇK-së”, gjatë një interviste në emisionin “Komitet” të prodhuar nga gazeta Express dhe të transmetuar në RTK, foli gjatë për tratativat ndërmjet CIA, Shërbimit Informativ Kombëtar dhe UÇK-së nga fillimet e deri në çarmatosjen e saj në fund të luftës. Klosi ka kritikuar linjën paqësore të Rugovës dhe goditi mjaft të ashtuquajturat FARK, për të cilët tha se nuk iu bashkuan asnjëherë luftës çlirimtare të Kosovës. Me një postim në faqen zyrtare në Facebook, Kryeministri i Kosovës, Isa Mustafa nuk kursen asgjë kundër Klosit: “Kosova u çlirua, sepse pati në krye një burrështetas të urtë e të mençur, të respektuar brenda e jashtë vendit, Presidentin Ibrahim Rugova.
Kosova nuk do të çlirohej kurrën e kurrës po të varej nga shërbimet informative, siç ishte edhe SHIK-u shqiptar, sepse shërbime të tilla me sjelljen e tyre më shumë u kanë shërbyer regjimeve dhe Serbisë, vëllavrasjes e hasmërive të brendshme, se sa pavarësisë së Kosovës dhe interesave kombëtare. Pa infiltrim dhe përzierje të SHIK-ut, UÇK do të ishte më unike dhe lufta do të ishte më e organizuar. Sot na vjen keq kur shohim se nga një gojë e keqe e një kryespiuni, spërkatet figura e Ibrahim Rugovës. Një fjalë popullore thotë: arni për thesin. Spiunët arnohen me të tyret, por nuk arnohen me figurën e Ibrahim Rugovës”.
/tesheshi.com/
