Trajneri gjerman i Liverpool-it njihet për deklaratat e tij interesante dhe thumbuese ndaj rivalëve. Mirëpo kësaj radhe Jurgon Klopp ka bërë një përjashtim. Në prag të duelit me rivalin e përjetshëm, Manchester United-in, gjermani i ka thurur elozhe ish-trajnerit të “djajve të kuq”, Sir Alex Ferguson-it.
“Ndoshta ai është trajneri më i mirë në histori. Mund të jetë John Lennon-i (anëtar i Bitëllsave, grupit të njohur të rokut) i futbollit, apo diçka e tillë”, i është përgjigjur tekniku i të kuqve pyetjes në lidhje me skocezin legjendar që ka shkruar historinë me “djajtë”.
Ndërkohë, Klopp u pyet gjithashtu për trajnerin e tanishëm të Manchester United-it, holandezin Luis van Gaal, i cili i ka ditët e numëruara në “Old Traford”.
“Luis van Gaal është një nga menaxherët më të suksesshëm në botë. Ka fituar shumë tituj, ka ide të veçanta mbi futbollin, dhe si kundërshtar duhet ta respektosh punën e tij”, ka përfunduar Klopp përgjigjet për gazetarët. /tesheshi.com/
