Lojtarët e Barcelonës shënuan mbrëmë një fitore bindëse 3:0 në Cam Nou kundër Liverpoolit në ndeshjen e parë të gjysmëfinales në Ligën e Kampionëve, e megjithatë, trajneri i “Redsave”, Jurgen Klopp, ishte i kënaqur pas ndeshjes, duke thënë se ekipi i tij luajti ndeshjen më të mirë në Ligën e Kampionëve si mysafir.
Golat për “Barçën” i shënuan Luis Suarez dhe dy herë Lionel Messi. Nga ana tjetër, James Milner, Roberto Firmino dhe Mohamed Salah nuk shfrytëzuan rastet e mëdha që kishin.
“Nuk e di nëse mund të luajmë më mirë se kaq. Mendoj se kjo ishte ndeshja jonë më e mirë si mysafir në Ligën e Kampionëve dhe jo vetëm këtë sezon, por edhe sezonin e kaluar. U thashë lojtarëve që jam krenar se si ata luajtën. Kundër rivalëve si Barcelona, që luan këtë lloj futbolli, jam shumë i lumtur. Është në rregull të humbasësh në Ligën e Kampionëve kur të shënosh një gol në anën tjetër, por nuk e bëmë dhe ky është një problem i madh”, tha Klopp.
Trajneri gjerman shtoi se lojtarët e tij përsëri kanë fituar respekt të madh për mënyrën e lojës së tyre dhe sa kanë përparuar.
“Aq shumë u argëtova duke shikuar ndeshjen, por humbëm. Kjo në këtë punë nuk është një kënaqësi për një kohë të gjatë dhe jam mësuar që t’i përballoj. Këta djem kurrë nuk dorëzohen. E dua këtë tek ta”, tha Klopp.
Ndeshja kthyese e gjysmëfinales Liverpool-Barcelona do të luhet më 7 maj në “Anfield”.
Finalja e edicionit të këtij viti në Ligën e Kampionëve do të zhvillohet më 1 qershor në stadiumin “Wanda Metropolitano” në Madrid. /AA/tesheshi.com/
