Vitali Klitschko tha se duhet të ketë një plan të qartë veprimi për departamente dhe shërbime të ndryshme në mënyrë që qyteti të mbrohet në një “situatë kritike”.
Kryetari i bashkisë së kryeqytetit ukrainas Kiev, Vitali Klitschko, tha të hënën mbrëma se ishte e nevojshme vendosja e sistemit të mbrojtjes territoriale në kryeqytetin ukrainas sa më shpejt të jetë e mundur për shkak të, siç pretendon ai, “kërcënimeve nga Rusia”, raporton media ruse.
“Deklaratat dhe kërcënimet që vijnë nga Rusia na detyrojnë të përgatitemi për skenarë të ndryshëm ngjarjesh. Sidomos për më të keqen”, deklaroi Klitschko në njoftimin në faqen zyrtare të qeverisjes lokale së qytetit të Kievit.
Ai tha se duhet të ketë një plan të qartë veprimi për departamente dhe shërbime të ndryshme në mënyrë që qyteti të mbrohet në një “situatë kritike”, transmeton RIA Novosti.
Sipas deklaratës, një shtab i mbrojtjes territoriale është formuar tashmë në Kiev, dhe stërvitjet e komandës dhe stafit do të zhvillohen në janar.
Më herët, Klitschko, një ish-kampion bote në peshat e rënda, tha se po përgatitej për një pushtim rus dhe do t’i bashkohej “luftës për vendin e tij”.
Ai i bëri thirrje bashkësisë ndërkombëtare që të ndihmojë Ukrainën dhe vuri në dukje se Perëndimi nuk mund të refuzojë mbledhjen ruse të njësive në kufirin me Ukrainën si “vetëm kërcënime dhe lojëra të vogla”. /tesheshi.com/
