Publiku dje “ngriti pluhur” për shkak të një deklarate të pretenduar të ish-boksierit të famshëm, sot kryebashkiaku i Kievit, Vitali Klitschko.
Ukrainasi legjendar mohoi sot deklaratën e supozuar se ukrainasit do të çlirohen nga Rusia “ashtu siç u çliruan shqiptarët nga Serbia”.
“Miq, disa media të huaja online, përfshirë ruse, kanë filluar të përhapin thënien time për Serbinë dhe Shqipërinë. Unë nuk e thashë këtë. Dhe para se të transmetojnë atë lloj informacioni dhe të citojnë ndonjë gjë, gazetarët duhet të kërkojnë dëshmi audio ose video ekskluzive”, tha Klitschko.
Kujtojmë se portali zviceran në gjuhën shqipe Le Canton27ch më herët raportoi se Klitschko në një bisedë me gazetarin Nefail Maliqi u shpreh i kënaqur që takoi një gazetar shqiptar për herë të parë, duke thënë se ishte një mundësi e mirë për t’i përcjellë një mesazh atij dhe popullit shqiptar.
“Kemi dëgjuar dhe lexuar që ju shqiptarët, si ne ukrainasit, jeni njerëz të paqes dhe liridashës, por edhe luftëtarë. Ne sot po luftojmë kundër regjimit rus që po përpiqet të pushtojë Ukrainën, si ju që dikur ishit të pushtuar nga Serbia”, ishte deklarata e Klitschkos.
Por siç thotë ai, këto fjalë nuk i ka nxjerrë nga goja. /tesheshi.com/
