Kryebashkiaku i Kievit, Vitali Klitschko, njëherësh një ish-boksier me famë, nga Davosi në Zvicër përcolli një mesazh për shqiptarët, veçmas për kosovarët, pasi u takua me gazetarin e njohur preshevar Nefail Maliqi.
Në një bisedë për gazetën lokale “Le Canton 27”, ai ka falënderuar shqiptarët dhe Kosovën për mbështetjen e tyre ushtarake, por edhe për solidaritetin me popullin ukrainas, duke thënë se “ukrainasit po luftojnë kundër pushtuesit rus, ashtu siç luftonin shqiptarët me atë serb”.
“Më vjen shumë mirë që kam takuar për herë të parë një gazetar shqiptar, që është një mundësi e mirë për të përcjellë një mesazh për ju, populli shqiptar në Ballkan. Kemi dëgjuar dhe lexuar që ju shqiptarët, si ne ukrainasit, jeni popull liridashës dhe paqedashës. Sot ne po luftojmë kundër regjimit rus që po përpiqet të pushtojë Ukrainën, si ju që dikur ishit të pushtuar nga Serbia,” tha Klitschko.
Siç pritej, publiku serb e priti tërbueshëm këtë deklaratë, duke e cilësuar atë skandaloze dhe të papranueshme.
Kujtojmë se në Davos po mbahet aktualisht Forumin Ekonomik Botëror, i cili mbledh së bashku liderët më të mëdhenj të botës. /tesheshi.com/
