Ekspertët parashikojnë se emetimet globale të dioksidit të karbonit, që ngroh Tokën, do të rriten me një për qind dhe kështu do të arrijnë një maksimum të ri në vitin 2023.
Ata paralajmërojnë se në këtë dekadë ndotja nga dioksidi i karbonit duhet të reduktohet me gati 50 për qind për të arritur objektivat e vendosura botërore, që janë kufizimi i ngrohjes globale dhe shmangia e një efekti katastrofik në klimë.
Këtë vit, emetimet globale të dioksidit të karbonit duhet të kishin rënë me rreth pesë për qind, tha Glen Peters, drejtor i Institutit për Kërkime Klimatike me bazë në Norvegji, CICERO, dhe studiues kryesor.
Por po ndodh pikërisht e kundërta. Hulumtimi që ai kreu në bashkëpunim me kolegët e tij tregoi se ato vazhdojnë të rriten dhe bazuar në pritjet aktuale, mund të presim një rritje të emetimeve midis 0.5 dhe 1.5 për qind këtë vit.
“Nuk ka gjasa që emetimet e dioksidit të karbonit të bien në vitin 2023”, tha ai për AFP.
Të dhënat paraprake tregojnë se do të jetë shumë e vështirë për të reduktuar emetimet aq shpejt sa për të përmbushur objektivat e Marrëveshjes së Parisit për të kufizuar ngrohjen globale në 1.5 gradë Celsius mbi nivelet para-industriale.
“Çdo vit emetimet e dioksidit të karbonit vazhdojnë të rriten, gjë që e vështirëson arritjen e qëllimeve të Marrëveshjes së Parisit”, tha Peters.
Lëndët djegëse fosile
Analiza përfundimtare do të publikohet në dhjetor. Më pas liderët botërorë do të takohen për bisedimet kyçe të OKB-së për klimën në Emiratet e Bashkuara Arabe. Tema kryesore e negociatave do të jetë e ardhmja e lëndëve djegëse fosile, burimi kryesor i ndotjes me dioksid karboni.
Më herët gjatë vitit, Agjencia Ndërkombëtare e Energjisë (IEA) paralajmëroi për ndikimin negativ të rritjes së investimeve në lëndët djegëse fosile dhe “emetimet jashtëzakonisht të larta” gjatë rimëkëmbjes ekonomike pas pandemisë dhe krizës energjetike të shkaktuar nga pushtimi rus i Ukrainës.
Peters beson se energjia e pastër duhet të zhvendosë kërkesën për lëndë djegëse fosile, por “kjo ende nuk po ndodh në një shkallë më të madhe, gjë që është zhgënjyese,” tha ai.
Peters shton se shkencëtarët shpresonin që emetimet e karbonit të arrinin kulmin në vitin 2015 dhe se një pikë kthese do të ndodhte gjatë pandemisë.
“Megjithatë, ja ku jemi në vitin 2022, kemi arritur sërish kulmin dhe në vitin 2023 presim një tjetër”, tha shkencëtari.
“Kam frikë se po bëjmë vetëm gjysmën e punës, ne po punojmë për energjinë e pastër, por jo për gjysmën tjetër, e cila është heqja dorë nga lëndët djegëse fosile”. /tesheshi.com/
