Presidenti francez Emmanuel Macron ka mërzitur Poloninë dhe irritoi aktivistët për klimën, pasi u tha atyre që të zhvendosin protestat nga Parisi në Poloni, një komb i Bashkimit Evropian që varet shumë nga qymyri.
Zëvendësministri i Jashtëm polak, Szymon Szynkowski vel Sek, tha të hënën se Macron “është në dijeni” se vendi i tij po përpiqej shumë për të zvogëluar emetimet e karbonit. Ai shpresonte që “në këtë fushë, si dhe në fusha të tjera, ai do të përmbahet nga ky lloj ligjërimi i cili, për rastin e tij, është bërë i lodhshëm”.
Por Macron mbrojti komentet e tij. “Unë nuk po stigmatizoj askënd. Por unë dua t’i bind miqtë tanë polak se është mirë që të ecin përpara”, tha ai në një konferencë për shtyp.
Polonia, e cila mbështet në qymyr për rreth 80% të energjisë së saj, ka një traditë të gjatë të minierave të qymyrit. Plani është që shteti i BE-së të eliminojë thëngjillin deri në vitin 2050, e për këtë i duhet të zhvillojë më shumë burime të rinovueshme të energjisë.
Macron e paraqet veten ndërkombëtarisht si një kampion i çështjeve të mjedisit, por aktivistët e klimës pretendojnë se ai nuk ka arritur të marrë masa konkrete në për të luftuar ndryshimin e klimës në Francë. /tesheshi.com/
