Veprimi ndaj klimës duhet të jetë një prioritet kryesor për të gjitha vendet anembanë botës, pavarësisht nga konfliktet e reja rajonale, tha Sekretari i Përgjithshëm i Kombeve të Bashkuara, Antonio Guterres.
“Është shqetësuese që lufta në Ukrainë ka larguar shumë vëmendjen nga veprimet klimatike. Ne duhet të bëjmë gjithçka që mundemi për ta kthyer çështjen e klimës në krye të axhendës sonë të përbashkët”, tha ai në një intervistë për The Guardian.
Sekretari i Përgjithshëm i OKB-së theksoi se ai është veçanërisht i shqetësuar për pabarazinë në rritje midis Veriut dhe Jugut.
“Pabarazitë vazhdojnë të rriten brenda vendeve, por tani ato po rriten në një mënyrë moralisht të papranueshme midis Veriut dhe Jugut, gjë që krijon një ndarje që mund të jetë shumë e rrezikshme nga pikëpamja e paqes dhe sigurisë”, tha Guterres.
Duke komentuar planet e disa anëtarëve të Bashkimit Evropian për të rritur përdorimin e qymyrit pas sanksioneve kundër burimeve energjetike të Rusisë, Sekretari i Përgjithshëm i OKB-së tha se shpresonte që vendet evropiane të mbajnë premtimet e tyre kundër ndotjes në afat të gjatë.
“Qymyri është armiku numër një i veprimit klimatik. Shpresoj që periudhat në të cilat disa vende do të djegin më shumë qymyr do të jenë shumë të shkurtra”, tha Guterres. /tesheshi.com/
