Mesfushori i talentuar turk me të vërtetë e përmbushi ëndrrën e tij për të luajtur një ditë me Barcelonën, por paraqitjet e tij të fundit lënë për të dëshiruar. Pakënaqësia është treguar qartë dhe te trajneri i tij, i cili është detyruar shpesh ta zëvendësojë për shkak të nivelit të ulët të lojës.
Por si është shndërruar një lojtar i tillë brenda pak muajsh nga një thelbësor për një skuadër si Atletiko e Madridit në një kandidat për të qëndruar apo për t’u ulur çdo çast në stol te Barcelona?
Përgjigjen e jep Marca spanjolle, e cila sugjeron që Arda Turan të ketë sindromën post-Simeone, prej së cilës ai po vuan si shumë lojtarë të tjerë që e kanë lënë Atletikon dhe janë transferuar në ekipe të tjera të mëdha, duke vuajtur fort më pas.
Marca përmend mes atyre që kanë provuar të njëjtën vuajtje lojtarë të tillë si Radamel Falkao, Filipe Luis, Diego Kosta, Marios Suarez e Adrian. E për ca prej tyre thotë që ende nuk e kanë marrë veten, duke vazhduar të vuajnë.
Vuajtja e këtyre lojtarëve, thotë Marca, nuk është asgjë tjetër veçse sindroma post-Simeone: ata kanë shkuar apo shkojnë në një klub të ri dhe u mungon më pas jeta e vjetër nën Diego Simeonen te Atletiko e Madridit.
Simeone ka qenë i vetmi trajner që ka mundur ta kuptojë lojën e Arda Turanit, e askush tjetër nuk ka mundur të marrë më shumë prej mesfushorit të talentuar turk. Sekreti i Simeones është vendosja e Arda Turanit që të luajë në një pozicion të palëvizshëm, sepse, ndryshe, liria e bën atë të humbasë në fushë.
Luis Enrike nuk duket t’i ketë dëgjuar këto fjalë, shkruhet te Marca, dhe profecia e Simeones ngjan të jetë vërtetuar: Arda Turan duket si peshku pa ujë te Barça! /tesheshi.com/
