Lioni dhe Marseja i kanë ndarë pikët në “Parc Olympique Lyonnais”, duke e mbyllur në barazim 1-1 përballjen mes tyre. Protagonistë të këtij takimi ishin Remy Cabella dhe Corentin Tolisso, të cilët shënuan për ekipet ku militojnë.
I pari i kaloi miqtë në avantazh në minutën e 64-t, e i dyti rivuri ekuilibrin në fushë 14 minuta më vonë.
Edhe pse Lioni pati epërsi të padiskutueshme në fushë, me topin në zotërim në 65 për qind të lojës, me 11 goditje në portë kundrejt 3 të lojtarëve të Marsejës, përsëri nuk arriti të fitojë.
Dueli me shumë rivalitet e tension mes lojtarëve dhe tifozëve u mbyll pa kënaqur asnjërën palë. Dy skuadrat gjenden në amulli prej kohësh, çka e tregon dhe pozicionimi i tyre në tabelën e renditjes. Si Olimpiku i Marsejës dhe Olimpiku i Lionit lundrojnë në mesin e artë, posaçërisht në vend të tetë dhe të nëntë, me nga 30 pikë. /tesheshi.com/
