Ish-ministrja e Integrimit në qeverinë “Rama1”, deputetja e LSI-së, Klajda Gjosha, u shpreh sot në Kuvend se shkrirja e institucionit që ka drejtuar tregon uljen e rëndësisë së proçesit të integrimit.
Sipas saj, deri në çeljen e negociatave ishte i nevojshëm Ministria e Integrimit si institucion, pasi kapacitetet njerëzore janë aseti më i rëndësishëm.
“Pas shpërfilljes me të cilën u trajtua ky proçes dhe mungesës së një vizioni dhe strategjie të qartë për 4 vitet e ardhshme më mbeten shumë pyetje dhe shqetësim se çdo të ndodhë me atë të zgjerimit. Shqipëria është në prag të çeljes së negociatave dhe kapacitetet njerëzore janë aseti më i rëndësishëm që do i duhet asaj.
Meqë vazhdimisht është përmendur rasti i Kroacisë si argument, do të risillja në kujtesën tuaj se ky vend e ka pasur një ministri dhe vetëm pas çeljes së negociatave përafroi këtë qasje. Kemi ulur rëndësinë e procesit.
Ngul këmbë se sot nuk kemi asnjë lloj vizioni, strategjie apo plani se si do të koordinohet proçesi i integrimit në vijim. Sërish shpresoj që puna e ekspertevë tanë vendas e të huaj të mos hidhej poshtë”, tha Gjosha. /tesheshi.com/
