Në Bangladesh, një vend në Azinë Jugore me një popullsi prej 170 milionë banorësh, prej ditësh po vazhdojnë përplasjet mes qytetarëve dhe policies, me një shpërthim dhune të përgjakshme që ka sjellë më shumë se 150 të vdekur, shkruan BBC.
Kryeministrja Sheikh Hasina Wajed fajësoi kundërshtarët e saj politikë për gjakderdhjen në vend, duke shtuar se ajo u detyrua të vendoste një shtetrrethim.
“Ne do të heqim shtetrrethimin në momentin që situata të përmirësohet,” tha ajo në një takim me drejtuesit e biznesit në kryeqytetin Dhaka.
Forcat e sigurisë janë akuzuar se kanë përdorur forcë të tepruar ndaj studentëve protestues. Policia arrestoi më shumë se 1,000 njerëz gjatë trazirave, duke përfshirë disa liderë të lartë të opozitës.
Një ditë para deklaratës së kryeministres, Gjykata e Lartë hoqi pjesën më të madhe të kuotave për vendet e punës në shtet, gjë që ishte një kërkesë kyçe e protestuesve.
Protestat u kthyen në një nga episodet më të përgjakshme të Bangladeshit në historinë e fundit dhe pati thirrje që Hasina të jepte dorëheqjen.
Kryeministrja fajësoi për dhunën opozitën dhe krahët e saj studentorë, duke thënë se qeveria e saj do të punojë për të “shuar protestat dhe për të krijuar një mjedis më të mirë”.
Analistët politikë theksojnë se trazirat janë një provë e paprecedentë për kryeministren, të cilën Forbes e renditi në mesin e 10 grave më të fuqishme në botë gjashtë vjet më parë.
Hasina, 76 vjeçe, siguroi një mandat të katërt si kreu i qeverisë së Bangladeshit në janar, në zgjedhjet e diskutueshme që u bojkotuan nga partitë kryesore opozitare të vendit.
Mohimi i të drejtave themelore të qytetarëve vit pas viti dhe natyra diktatoriale e regjimit të saj kanë tërbuar pjesën më të madhe të shoqërisë, vëren Mubashar Hasan, një studiues në Universitetin e Oslos që studion autoritarizmin në Azi.
Fatkeqësisht, ajo nuk u bë kurrë kryeministre për të gjithë në vend. Në vend të kësaj, ajo mbeti udhëheqëse e vetëm një grupi të shoqërisë, tha ai për BBC. Kryeministrja Hasina është vajza e themeluesit të Bangladeshit modern, i cili u vra në vitin 1975. Ajo konsiderohet si një nga gratë më të fuqishme në Azi, për shkak të kontributit të saj në zhvillimin e shpejtë ekonomik të një vendi që dikur ishte një nga më të varfërit.
Çfarë i zemëroi kaq shumë studentët? Përpara vendimit të gjykatës të dielën, Bangladeshi kishte futur kuota prej rreth 30 për qind të punëve qeveritare të paguara mirë për anëtarët e familjeve të atyre që luftuan në luftën e Bangladeshit të vitit 1971 për pavarësi nga Pakistani.
Gjykata vendosi të dielën se 93 për qind e vendeve të punës do të plotësohen ende sipas meritës.
Edhe para ligjit të kontestuar, situata në vend ishte e palakmueshme për shkak të shkallës së lartë të papunësisë, korrupsionit të përhapur dhe standardit të dobët të jetesës.
Gjashtë vite më parë, ligji i kontestuar u shfuqizua pas protestave të ngjashme, por në qershor të këtij viti Gjykata e Lartë e shpalli një vendim të tillë antikushtetues.
Të parët që dolën në rrugë ishin studentët në kampusin universitar në Dhaka të cilët u mblodhën për një protestë paqësore më 1 korrik, por situata u përshkallëzua në shtatë ditët e fundit në konflikte të përgjakshme, të tilla që Bangladeshi nuk i kujton.
Studentët thërrasin qeverinë për favorizimin e padrejtë të fëmijëve të grupeve pro-qeveritare. Fillimisht, Hasina hodhi poshtë shqetësimet e protestuesve dhe analistët thonë se ajo i përkeqësoi trazirat. Më 14 korrik, ajo nxiti më tej zemërimin e protestuesve.
“Pse protestuesit janë kaq të hidhëruar ndaj luftëtarëve të lirisë, nëse nipërit e luftëtarëve të lirisë nuk marrin beneficione, a duhet t’i marrin ato beneficione nipërit e Razakarëve?
Razakar është një term nënçmues në Bangladesh që i referohet një force paraushtarake të përbërë nga qytetarë bangladeshas që luftuan në anën e Pakistanit gjatë luftës së vitit 1971. /tesheshi.com/
